Klâng bê têa, báu mê ngiât lĕm a “tơbăng klâng kân 132” a cheăm Čư Êa Lang, tơring Ea Kar, kong pơlê Dak Lak. A kơhâi dế kong tô khăng khoăng, ếo kơchoh têa kơxôu laga rơkong tó dêi Sa Moan Krông eăng tung ƀăng báu ngiât lĕm.

Sa Moan Krông, hngêi ối a ƀuôn Briu, cheăm Čư Huê, tơring Ea Kar tối ăm ‘nâi, xua ôh tá bê tơnêi pêt mơjiâng tơmeăm, rơpŏng châ xing xoăng klâng a ƀăng klâng sap ing hơnăm 2016. Ôh tá tối apoăng hơnăm pêi lo iâ xua tá hâi chiâng pêi, mâu hơnăm kơ’nâi mê, rơpŏng hiăng chiâng pêi 2 rơnó, 10 tâ̆n báu rêm hơnăm. Rơnó tô hơnăm kố kong tô ó, klâng dêi rơpŏng mê á mơ’nui hno têa, xua mê Sa Moan Krông thế lăm kơxo má vâ ‘no têa ‘mot tung klâng:

“A ƀuôn Êa Đơk anei, ƀuôn Briu ai to lâi hrĭng rơpŏng châ tơnêi têa xing xoăng klâng, rơpŏng á châ xing xoăng 3 sao 7 klâng. Troăng prôk lăm a klâng hơngế, thế lăm pôu klâng ƀă xo têa tro hâi nếo ai têa’’.

Pôa Nguyễn Ngọc Hòa, Kăn hnê ngăn Vi ƀan cheăm Čư Êa Lang tối ăm ‘nâi, pakĭng ‘’klâng 132’’ châ pro tiô Pơkâ 132/2003 dêi Ngế pro xiâm hnê ngăn Chin phuh, xing xoăng ăm kuăn pơlê hdroâng kuăn ngo ôh tá bê tơnêi pêt mơjiâng tơmeăm, Rơnó Xeăng tô kố, kuăn pơlê pêi chiâk deăng tung cheăm ối pêt 500 hectar báu a mâu kơpong pêi klâng. Sap apoăng rơnó, khu râ kăn pơkuâ hiăng mơhnhôk kuăn pơlê pêt báu tro rơnó, kơdroh pêt báu a mâu ƀăng klâng ôh tá bê têa, xua mê troh nôkố xuân chiâng ví kong tô khăng khoăng.

“Kong tô khăng khoăng kô ai. Ƀă tơdroăng mơ’no têa dêi Kŏng ti rơchôa hno têa, cheăm hbrâ tơbleăng ăm kuăn pơlê, ki rơhêng vâ tối cho mơngế ai ƀăng deăng pêt báu hbrâ tơrŭm ƀă kŏng ti rơchôa hno têa tiô hâi khế xing xoăng têa dêi rêm kơpong vâ hbrâ mơ’no têa ‘mot tung klâng. Ví mơ’nhê tê kơtê ƀă ôh tá troh mâu kơpong klâng ki a hơngế’’.

Kŏng ti ngăn ‘na rơchôa hno têa Dak Lak tíu pêi cheăng Ea Kar pơkuâ 20 rơchôa hno têa, ai 18 long têa, 1 rơchôa ƀă 1 tíu kơmăi hrik mơ’no têa. Ƀăng deăng tơniăn têa tôh dêi Tíu pêi cheăng Kŏng ti cho 3.220 hectar mâu loăng plâi. Tung mê ai 1.800 hectar loăng plâi ton hâi ƀă 1.150 hectar báu. Pôa Nguyễn Tiến Sĩ, Kăn pơkuâ Kŏng ti long rơchôa hno têa Dak Lak tíu pêi cheăng Ea Kar tối ăm ‘nâi: Nôkố a 14 long rơchôa hno têa xua Kŏng ti pơkuâ, kơxô̆ têa xuân ối bê.

A long rơchôa hno têa Ea Rớt, cho long rơchôa têa kân má môi a tơring Ea Kar ƀă kơdoăng têa lối 18 rơtuh met khô̆i têa. Hiăng lối 1 khế kố, 10 ngế kăn ƀô̆ a tíu kố xing xoăng hâi khế gâk pêi cheăng, klĭng – po troăng têa plâ hâi plâ măng. Pôa Phạm Ngọc Linh, pơkuâ tơdroăng mơ’no têa long rơchôa têa Ea Rớt tối ăm ‘nâi, têa tung long rơchôa nôkố bu u ối 45% tê. Kăn ƀô̆, nhân viên mâu tíu mơ’no têa thế đi đo séa ngăn krá tơniăn tơdroăng xo têa ing mâu hno têa mâu rơpŏng, tơniăn xúa bê têa, xúa châ tơƀrê:

“Long rơchôa xuân tơniăn bê têa vâ tôh troh mơ’nui rơnó xeăng tô kố. Tâi tâng ing khu râ kăn pơkuâ troh mơngế pêi cheăng dêi tíu pêi cheăng kô tơrŭm rơtế khu râ kăn pơkuâ vâ pơtâng tối, mơ’no têa xúa têa kơdĭng má môi’’.

Dế a rơnó tô khăng khoăng dêi Tây Nguyên, kong tô khăng khoăng ai a mâu tơring, tơdjâk troh pêt mơjiâng mâu loăng plâi. Laga mơngế pêi báu a tơring Ea Kar, kong pơlê Dak Lak hiăng hbrâ têa vâ tôh. Rơnó xeăng tô a tơring xuân hbrâ bê têa tôh ăm loăng plâi.