Pêi pro tiô tơdroăng hnê tối dêi khu kăn pơkuâ ƀă kơvâ ngăn ‘na chiâk deăng dêi tơring Kon Plông tung mâu hâi ki hyôh kong prâi hngíu ó, ai inôa, kong mêi, 145 rơpŏng kuăn pơlê Rơteăng a pơlê Kon Vơng Kia, pơlê kân Măng Deang hiăng pêi pro hên tơdroăng vâ rak vế ngăn khu kơpôu ro. Tơdrêng ƀă tơdroăng ôh tá kơ’nê kơpôu ro tung kong mê mâu rơpŏng hnê tối dêi pó, djâ dêi pó pro 35 to kơdroăng vâ kroăng kơpôu ro tơkŭm vâ tơ’lêi ăm tơdroăng pơkuâ ngăn, rak roăng. Ngoh A Ka Riak, môi ngế tung pơlê, tối rêm hâi mâu rơpŏng hngêi xing xoăng dêi pó pêi pro hnoăng cheăng ki hbrâ ăm kơpôu ro ôh tá tro kơklêa, ôh tá tro kăng hngíu:

“Tiô kơ tơdroăng xing xoăng, hâi ki lâi rơpŏng ki lâi lăm kơ’nê, rơpŏng ki mê lăm pôe nhâ a kong vâ djâ vêh chĕm ăm kơpôu ro i rê tung kơdroăng. Thăm nếo, tá mâu eâk kơpôu ro, rơpŏng ki lâi kơ’nê hâi ki mê rơpŏng ki mê athế tơkŭm eâk ga ing kơdroăng ‘măn tung klôh, la lâi tung kơdroăng xuân krúa lĕm. Hding tâ tá kơdroăng, chôu hrái báu, mơnoh vâ rak ki hơtô ăm kơpôu ro i châ koi hlâk’’.

Cho kong tơring ki hmâ trâm hyôh kong hngíu a rơnó khía hngíu, mâu hơnăm achê pơla kố tơring Kon Plông, kong pơlê Kon Tum hmâ kơhnâ tung tơdroăng hnê tối, mơhnhôk vâi krâ-nhŏng o hdroâng kuăn ngo ‘nâi hlê ‘na tơdroăng hbrâ pêi pro mâu tơdroăng mâ tá ăm kơpôu ro tro kơklêa, tro kăng hngíu. Kơnôm ôh tá ai kơ’nê kơpôu ro lo pá kong, mot tung kong, xua mê, a tơring kố ôh pá hlo ai kơpôu ro tro hlâ hên hĕng a mâu rơnó kăng hngíu, khu kơpôu ro dêi tơring rế hía rế tâk hên, tâi tâng khu kơpôu ro dêi tơring nôkố ai vâ chê 24 rơpâu to. Pôa Võ Đình Tân, Kăn phŏ ngăn Bơrô Chiâk deăng ƀă Mơnhông thôn pơlê dêi tơring Kon Plông tối, hdrối vâ troh a rơnó khía hngíu hơnăm kố, khu kố hiăng lăm xing xoăng 1 rơpâu kơtâ hlá mơ-eá hnê tối ăm kuăn pơlê hbrâ pêi mâu tơdroăng ăm kơpôu ro châ kâ phâi, ôh tá tro kăng hngíu, hbrâ mơdât pơreăng ăm kơpôu ro:

“Lo a rơnó khía hngíu, vâi krâ-nhŏng o hiăng ‘nâi tăng kế vâ hding, ‘mâi rơnêu kơdroăng. ‘Na kế kâ ăm kuăn pơlê xuân kơnôm ‘nâi xúa hrái báu klêi kơ’nâi pôe báu. Pakĭng mê, kuăn pơlê ối ‘nâi lăm pêt nhâ, pêt priât vâ ai kế kâ chĕm ăm kơpôu ro kâ tơ’nôm. Drêng kong prâi lo hngíu mê kuăn pơlê hiăng  ‘nâi kroăng kơpôu ro tung kơdroăng. Ki hên kuăn pơlê nôkố hiăng ‘nâi kơ’nê ƀă rak ngăn, troh a kong măng hiăng poăng kơpôu ro mot tung kơdroăng, đi đo hmâ kơpuih văng, pro krúa lĕm ăm kơdroăng, xôh pơkeăng kơdê pơreăng tung kơdroăng tiô rêm roh’’.