Ai lối 200 ngế kuăn pơlê pêi chiâk deăng, khu tơrŭm cheăng a kong pơlê Dak Nông hiăng ai roh trâm mâ, tơpui tơno, ti tăng rơkong tơpui ƀă mâu khu tê mơdró tung kong pơlê ƀă pakong kong pơlê. Troh nôkố, Dak Nông hiăng mơjiâng châ 23 tơmeăm ki xiâm, kơvâ cheăng ki rơdêi, kơvâ cheăng ki tơmeăm hên ƀă pêi lo châ hên ƀă dâi lĕm tơmeăm pêi lo ing chiâk deăng chôa ‘lâng mơnhên tíu cheăng tung kơchơ mơdró.

Tung mê ai 140.000 ha kơphế, pêi lo châ lối 350.000 tâ̆n, ƀăng deăng tiu 34.000 ha ối má môi lâp tơnêi têa. Pakĭng mê ối ai mâu loăng plâi kâ môi tiah plâi sầu riêng, ƀơr, mắc-ca ƀă ƀăng deăng ƀă pêi lo châ hên. A hneăng hôp tơpui tơno, mâu khu tê mơdró troh ing hên kong pơlê, pơlê kong kơdrâm rơtế mâu khu tơrŭm cheăng, kuăn pơlê pêi chiâk deăng a Dak Nông hiăng tơpui tơno tơdrăng, ti tăng rơkong tơpui tơdjuôm vâ tơrŭm cheăng la ngiâ mơjiâng mâu tơdroăng pêt mơjiâng tơmeăm – tê tơmeăm pêi lo ing chiâk deăng.