Pơla hdrối mê hía nah, mâu khu hnê mơhnhôk pêi chiâk deăng hiăng kum ăm kuăn pơlê, mâu khu pêi cheăng tơrŭm ‘na túa po văng nhâ, rak ngăn kơphế tro tiô pơkâ, po rơdâ kơpong ki pêt kơphế tơniăn ton vâ thăm mơdêk ki kơnía dêi kơphế. Tung mê, túa hnê mơhnhôk pêi chiâk deăng a Kong pơlê Kon Tum châ vêh mơnhên tối cho ‘ló khât rơtế tơrŭm cheăng ƀă vâ chê 400 rơpŏng,  pêi lo 2 rơpâu tâ̆n kơphế ki tro tiô túa pơkâ 4C.

Klêi kơ’nâi tơmâng mâu rơkong hnê tối ‘na thăm mơdêk ki rơkê tung pêi chiâk deăng dêi khu hnê mơhnhôk pêi chiâk deăng, pôa Lê Quốc Thanh, Kăn pơkuâ ngăn khu xiâm hnê mơhnhôk pêi chiâk deăng tơnêi têa tối ăm ‘nâi, Khu xiâm hnê mơhnhôk pêi cheăng deăng tơnêi têa kô đi đo tơrŭm cheăng, veăng kum vâ thăm mơdêk ivá cheăng dêi mâu khu tơrŭm cheăng pơlê pơla, maluâ a kơpong ki pêt kơphế dêi Tây Nguyên.