Klêi kơ’nâi muih treăm, po pông tơnêi, tâi tâng mâu rơpŏng hngêi hiăng mơdâ hdrê ing khế 12/2023 troh nôkố, hâi ki lâi a Kơdrum sâm Ngọc Linh ki Ngế pro xiâm hnê ngăn Chin phuh hbru hdrê ăm rơpŏng kơtiê dêi tơring Tu Mrông, kong pơlê Kon Tum xuân ai mâu kuăn pơlê gak ngăn, rak vế ngăn kơdrum sâm. Ngoh A Phai, ối a thôn Tân Ba, cheăm Tê Xăng tối ăm ‘nâi, thôn dêi ngoh ai 22 rơpŏng kơtiê châ tơring xing xoăng rêm rơpŏng ai 40 hdrê pôm sâm Ngọc Linh ki Ngế pro xiâm hnê ngăn hiăng hbru ăm. Vâ mâu hdrê sâm châ chiâng dâi lĕm, tâi tâng mâu rơpŏng kơtiê ki châ hbru hdrê mê pơrá ai tơdroăng ki rak ngăn, po văng ngăn dâi lĕm a tơrêm pôm sâm:

“Vâi krâ-nhŏng o dêi 22 rơpŏng kơtiê hding kuâ, mơnât vâ mơdât kơnái, chêm châ mot kâ ‘nhiê sâm. Klêi mê, tăng tơnêi ki hơpok lĕm vâ rak ăm sâm chiâng dâi lĕm. Pro klêi tro tiô tơdroăng pơkâ mê 3 rơpŏng cho môi khu lo lăm tôh têa, klêi mê, lăm ngăn dêi tơrêm xiâm sâm, vâ tơniăn ăm sâm chiâng dâi lĕm”.

Ngoh A Phát, mơngế ki tung plâ mâu hâi Têt Lo hơnăm nếo đi đo ai mâ vâ rak vế ngăn dêi kơdrum sâm Ngọc Linh, ai tối tiah kố:

“Kơnôm châ Ngế pro xiâm hnê ngăn Chin phuh hbru kum ăm hdrê sâm mê ngin phiu ro ó khât ƀă hơniâp ro xua ngin cho tung rơpŏng kơtiê. Kơ’nâi mê, sâm xông dâi lĕm, ai pôm, ai kông dâi lĕm rơpŏng ngin kơtiê tiah kố tơngah kô châ hluăn ing kơtiê, vâ xông tơtêk môi tiah mâu rơpŏng ki ê há”.

Vâ tơ’lêi hlâu ăm 300 rơpŏng a 23 to thôn ối tung 8 to cheăm tung tơring ai tơnêi pêt 12 rơpâu xiâm sâm Ngọc Linh châ Ngế pro xiâm hnê ngăn Chin phuh hbru, mê khu kăn pơkuâ ngăn tơring Tu Mrông hiăng pơcháu ăm rêm cheăm ki vâ iâ ai 5 sao tơnêi a hbêa ngo Ngọc Linh a kơpong 6, cho Xá 218 ối tung cheăm Măng Ri.

Tơnêi ki kố a ‘ngêi châ lối 1 rơpâu 500 met tâng vâ pơchông ngăn ƀă rơgâ têa kơxĭ, pá kơdâm loăng kong ki chiâng xêh tơ’lêi ăm tơdroăng mơdâ pêt sâm Ngọc Linh. Khu kăn pơkuâ tơring xuân hiăng tơmiât pơkâ ing kơdrum ki châ 12 rơpâu xiâm sâm hdrê vâ po rơdâ chiâng kơdrum sâm ki ê nếo, tơdrêng amê, tŏng kum kih thuât pêi pêt, rak ngăn vâ ga tơniăn ăm pôm sâm chiâng dâi lĕm, chiâng dâi vâ kum tơ’lêi hlâu ăm tơdroăng rêh kâ ối tơniăn ăm kuăn pơlê. Pôa Võ Trung Mạnh, Kăn hnê ngăn Vi ƀan hnê ngăn tơring Tu Mrông, kong pơlê Kon Tum tối ăm ‘nâi:

“Ngế pro xiâm hnê ngăn hbru hdrê sâm ăm rơpŏng kơtiê vâ tăng troăng cheăng kâ, rêh ối ton la ngiâ ƀă kum ăm kuăn pơlê châ hluăn kơtiê, châ mơnhông tung tơdroăng rêh kâ ối. Ing tơdroăng ki tŏng kum dêi Ngế pro xiâm hnê ngăn tơring hiăng pơcháu ăm Ƀơrô ngăn ‘na Chiâk deăng, Tíu xiâm hnê ngăn ‘na chiâk deăng hnê mơhno ‘na túa kih thuât ăm vâi krâ-nhŏng o vâ tơkŭm, rak vế tơniăn kih thuât ki tơ’ló má môi. Mơjiâng túa cheăng vâ pơkuâ ngăn kơdrum sâm tiô kơ tơdroăng ki xing xoăng hnoăng cheăng ki nhên ƀă khu râ kăn pơkuâ mâu cheăm tung rêm hnoăng cheăng kring vế, rak ngăn xuân môi tiah rak ngăn kơdrum sâm tơniăn lĕm. Ing mê, cho ki xiâm dêi Tơdroăng cheăng xiâm tơnêi têa tŏng kum ăm kuăn pơlê vâ mơjiâng mâu kơnâng ki hding vế rak vế ngăn kơdrum pôm pơkeăng kong”.