A mâu kơdrum tiu a kong pơlê Dak Lak, mâu hâi ki kố, tơdroăng ki krí tiu chiâng hlo hơniâp ro tâ. Ngế ki pêt tiu phiu ro drêng yă tiu kloăng dế ối kơlo ki kơnâ. Nôkố yă tiu dế pơhlêh ing 89 rơpâu troh lối 90 rơpâu liăn tung 1kg.

Kong pơlê Dak Lak ai vâ chê 32 rơpâu ha ƀăng deăng pêt tiu, kloăng tiu châ vâ chê 90 rơpâu tâ̆n. Tơdroăng ki yă tiu ôh tá tơniăn tung mâu hơnăm hdrối mê hía nah, tung pơla hyôh kong prâi pơreăng kâ ‘nhiê hên, yă liăn roê pơkeăng, mung mâu ngế cheăng to kơnâ troh pêi châ liăn xuân môi tiah hiâm mơno ngế ki pêt tiu. Yă tiu dế hlo pơhlêh ing apoăng rơnó krí hơnăm 2024 cho tơdroăng ki hlo hơ’lêh vâ kuăn pơlê hmiân tuăn ‘no liăn pêt tơ’nôm tiu.