Kuăn pơlê a kong pơlê Long An hiăng pâ thế Khu xiâm ngăn ‘na Chiâk deăng ƀă Mơnhông thôn pơlê, Khu xiâm ngăn ‘na tơmeăm khoăng, Hyôh kong prâi xuân môi tiah mâu khu râ, kơvâ cheăng ai tơdjâk pơtối tŏng kum hên troh tơdroăng kơdroh têa xăng po lân a mâu kong pơlê peăng Hdroh tơnêi têa. Ing mê ah, vâ ai mâu tơdroăng cheăng ki tŏng kum păng ‘nâng:

Tung tơdroăng pêi cheăng kâ tơdjuôm, kuăn pơlê kong pơlê Long An tối tiah kố, kong pơlê kố dế mơjiâng mâu khu pêi cheăng tơrŭm ‘na kơvâ chiâk deăng vâ tơdjêp tơrŭm ing tơdroăng pêi pêt tơniăn troh tơdroăng ki krí xo, tê mơ’no, uâ mơdiê kế tơmeăm klêi kơ’nâi châ krí xo dêi tơmeăm ƀă hên mâu tơdroăng ki ê.

Maluâ ivá cheăng dêi Khu ngăn ‘na pêi cheăng tơrŭm ôh tá rơdêi, xua hên khu kăn pơkuâ ngăn mâu pêi cheăng tơrŭm cho kuăn pơlê mê ôh tá châ mơnhông môi tiah tơdroăng hiăng pói vâ. Tiah mê, mâu khu râ, kơvâ cheăng dêi tơnêi têa, maluâ cho Khu xiâm ngăn ‘na chiâk deăng ƀă mơnhông thôn pơlê kal ai tơ’nôm troăng hơlâ ki tơtro vâ kum tơdroăng pêi cheăng kâ tơdjuôm păng ‘nâng chiâng troăng hơlâ ki xiâm tung mơnhông pêi chiâk pêi deăng, môi tiah tơdroăng pơkâ kơxô̆ 150 dêi Chin phuh cho tơdroăng ki hơ’lêh tuăn tơmiât ing pêi chiâk deăng tá troh a tơdroăng pêi lo kế tơmeăm vâ tê mơdró.

Tung mơnhông pêi chiâk deăng, pôa Lê Văn Nam, kuăn pơlê a tơring Bến Lức, kong pơlê Long An ai tối tiah kố, ki kal má môi cho pơtâng tối mâu tơdroăng ki nếo ai ‘na tơdroăng tê rôe kế tơmeăm tung tơnêi têa ƀă kong têa ê. Ki mơnhên mê ăm hlo, a tơring ki kố, pôa Nam tối, tơring Bến Lức ai 100 rơpâu ha deăng plâi krui kơxái, ôh tá ai kloăng. La tơdroăng ki mơ’no tê plâi krui kơxái tiah kố châ mơjiâng pro tiô túa cheăng, mơ’no tê troh a kơchơ mơdró dêi châu Âu ƀă Trung Đông. Maluâ tiah mê, mâu khu pêi cheăng tơrŭm xuân ai rôe plâi krui kơxái bu cho tơdroăng ki pêi pro tiô túa ki kuăn xua mê, kuăn pơlê mơhnŏng pơkâ dêi yă:

“Kố cho tơdroăng ki pá hê ó. Xua ti mê, kuăn pơlê kong pơlê Long An xuân pói rơhêng vâ châ pơtâng tối hên mâu tơdroăng ki nếo ai, châ hlê plĕng ‘na tơdroăng tê rôe kế tơmeăm, ‘na yă mơdró kế tơmeăm tung tơnêi têa ƀă kong têa ê. Ing mê, kuăn pơlê châ trâm mâ, tơrŭm tê mơdró ‘na kế tơmeăm hnối pơkâ yă tơtro”.

Tung mơnhông ‘na pêi chiâk deăng tung kơphô̆ ƀă mâu túa cheăng chiâk deăng ki xúa kơmăi kơmok ki ó mê kal ai kơxô̆ liăn hên. Khu mơdró kâ tung kơvâ chiâk deăng kal châ tŏng kum ôh tá xo laih drêng mung ing hngêi rak liăn, tiô tơdroăng ki pơkâ ki kal kân dêi pơlê kong kơdrâm. Mâu khu pêi cheăng tơrŭm ‘na pêi chiâk deăng, kăn pơkuâ ngăn chiâk deăng xuân châ tŏng kum ‘na laih klêi kơ’nâi mung liăn vâ kum tơ’lêi hlâu ăm tơdroăng ki pêi pêt hdrê loăng, mơnăn păn tiô túa ki krâ kơvâ ƀă ki kŭn.

Pơlê kong kân Hồ Chí Minh cho ki xiâm dêi tơdroăng tơrŭm pơla khu kuăn pơlê, khu pêi cheăng tơrŭm ƀă khu mơdró kâ kum rôe ‘na tơmeăm khoăng pêi lo ing chiâk deăng tiô túa ki pêi pro logistics tung pêi chiâk deăng. Ki tơrŭm cheăng kố, cho vâ mơnhông tơdroăng tơrŭm tê mơdró kâ, tê rôe mâu tơmeăm vâ xúa tung pêi chiâk pêi deăng, moi tiah: Drê, ‘nêk, phon rơvât, pơkeăng xôh kơdê oâ hdrong pơla Pơlê kong kân Hồ Chí Minh ƀă mâu kong pơlê ƀă hên hĕng mâu tơdroăng ki ê.

Troăng prôk kố, kô kum vêh mơnhên tơdroăng pêi chiâk pêi deăng dêi Pơlê kong kân Hồ Chí Minh ƀă kơpong peăng Hdroh. Maluâ ti mê, vâ mơnhông tơdroăng pêi chiâk pêi deăng tiô tuá mơdêk pro kơphô̆ mê kal athế ai túa ki mơjiâng a tơnêi tíu dêi chiâk deăng, tơdroăng ki kố mơhno tối ‘na tơdroăng ki ối tơvâ tơvân hên tiô pơkâ ki Pơlê kong kân Hồ Chí Minh ôh tá chiâng vâ pêi pro, lêi tah ki tơvâ tơvân mê. Pôa Võ Hoàng Vũ, kuăn pơlê a cheăm Hưng Long, tơring Bình Chánh, Pơlê koing kân Hồ Chí Minh pâ thế:

“Kuăn pơlê pâ thế kal mơdêk tơmeăm khoăng ki pơtân a tơnêi pêi chiâk deăng, kum tung pêi chiâk pêi deăng, xúa kơmăi kơmok, môi tiah hnôu ki tâ ‘măn kế tơmeăm, hngêi ki hding, lêm ƀă lâm, nâ ƀă hên hĕng mâu tơmeăm ki ê ki ối tơvâ tơvân xua tơdjâk troh mâu tơdroăng pro hlá mơ-eá ai tơdjâk troh tơdroăng mơjiâng, kô tơ’lêi ai tơdroăng ki po rơdâ troh mâu tơmeăm khoăng ki ôh tá tro luât. Xua ti mê, tơdroăng ki thăm mơdêk pêi chiâk deăng a tung kơphô̆ cho tơdroăng ki trâm pá. Kal khât tơdroăng ki tŏng kum dêi Khu xiâm ngăn ‘na chiâk deăng, mơnhông thôn pơlê ƀă mâu tơdroăng ki ai tơvâ xua tơdjâk troh troăng hơlâ ki vâ tah lôi ki tơvâ tơvân, vâ kum kuăn pơlê khên pêi, khên pro, rak tơniăn ăm tơdroăng mơ’no liăn mơnhông pêi cheăng kâ tung la ngiâ kố ah”.

A roh hôp iâ mơnhên mâu tơdroăng êng tiâ a kơxê hâi lơ 6/11, pôa Lê Minh Hoan, Ngế xiâm ngăn ‘na chiâk deăng ƀă mơnhong thôn pơlê ai tối tiah kố, ai mâu vâi krâ-nhŏng o pêt kong a kơpong 2, kơpong 3, cho mâu cheăm ki xahpá, malối xahpá ối tung pơlê cheăm dêi hdroâng kuăn ngo ki iâ mơngế ƀă kong ngo, ki nhên mê cho kong pơlê Bắc Kạn ƀă mâu kong pơlê ki ai kong, ki ‘ló ga athế châ xo kơxô̆ liăn ki mơhá kong, rak vế kong hơnăm 2021, la troh nôkố tá hâi châ mơnhên. Tơdrêng amê, Khu xiâm xuân pâ thế ‘na tơdroăng ‘mâi rơnêu 31 tơdroăng ki xiâm tung mơjiâng thôn pơlê nêó tơtro ƀă mâu tơdroăng ki kal dêi mâu kơpong kơtiê xahpá.