Kong tôu ó ƀă ôh tá ai mêi pro tơ’lêi chếo kong a Lâm Đồng păng ‘nâng. Vi ƀan kong pơlê Lâm Đồng đi đo tơbleăng mơ-éa hnê mơhno, mơhnhôk, pơchân tối Khu pơkuâ ‘na pêi chiâk deăng ƀă mơnhông thôn pơlê, Vi ƀan mâu tơring, pơlê kong kơdrâm tung kong pơlê hnê mơhno Khu gâk ngăn kong, mâu khu pơkuâ kong, Vi ƀan mâu cheăm ƀă mâu tíu cheăng ki tơdjâk pêi pro kơtăng mâu troăng pêi, troăng hbrâ mơdât chếo kong hiăng châ kĭ.

Tung mê, ki rơhêng vâ tối tơtrŏng pêi pro kơtăng troăng pêi ‘’4 tơdrêng’’ tung hbrâ, tơpâ on chếo kong; ai mâu troăng pêi tơniăn khu mơngế tơpâ on, tơmeăm vâ tơpâ on, kơmăi kơmok ƀă tơmeăm ki xúa vâ teăm tơdrêng châ hlo, tơpâ on drêng ai on chếo kong, ôh tá ăm xông chếo rơdâ, chếo kân.