Mơnhên ‘na tơmeăm ki ai hlâu ƀă mơnhên troăng prôk la ngiâ tơrŭm cheăng pơla 2 pâ troh hơnăm 2030, mâu tham luâ̆n a hôp tơpui tơno rơtế dêi pó tơpui tơno ‘na mâu tơdroăng ki tơ’lêi pơchông xuân môi tiah hên hĭn mâu troăng tơrŭm cheăng, mơ’no liăn cheăng. Tung kơvâ pêi chiâk deăng, tơrŭm cheăng pơla 2 kong têa tơkŭm tung hnê kŏng ngê̆ ‘na mơjiâng loăng sinh hok, mâu hdrê kơchâi ki má môi, kŏng ngê̆ pêt mơjiâng kơxêt kâ, kơxêt pơkeăng, mơjiâng tơmeăm tơniăn, pêt mơjiâng plâi kâ ôn đới, mơnhông mơhnhôk pêi chiâk deăng, xúa kơmăi kơmok 4.0 tung pêi chiâk deăng ƀă mơdêk tê mơdró tơmeăm pêi lo ing chiâk deăng cho tơdroăng ki rơdêi dêi rêm kong têa.

Tiô pôa Lê Minh Hoan, Ngế xiâm pơkuâ ‘na pêi chiâk deăng ƀă mơnhông mơdêk thôn pơlê, tơrŭm pêi chiâk deăng pơla Việt Nam ƀă Hàn Quốc ối hên tơnêi vâ mơnhông. Hàn Quốc cho tơnêi têa ai tơdroăng pêi chiâk deăng tiô rơxông nếo, hdrê loăng plâi hên hĭn, cho kong têa ai hên ki tơ’lêi hlâu tung xúa kŏng ngê̆ rơxông nếo tung pêt mơjiâng tơmeăm ƀă uâ mơdiê tơmeăm pêi lo ing chiâk deăng ki Việt Nam pói vâ tơrŭm cheăng tung la ngiâ.