Sap kơxô̆ 12 rơpâu xiâm pơkeăng kong Ngọc Linh hdrê, Ngế pro xiâm hnê ngăn Phạm Minh Chính ăm mâu rơpŏng kơtiê, Vi ƀan tơring Tu Mrông hiăng pơkâ xing xoăng, kum ăm 300 rơpŏng ki kơtiê a 23 to thôn dêi 8 to cheăm tung tơring. Tung mê, cheăm Măng Ri ai kơxô̆ rơpŏng kơtiê châ kơjo kum ăm hdrê pơkeăng kong Ngọc Linh hên má môi ai 135 rơpŏng, ki iâ má môi cho cheăm Đăk Tơ Kan ai 10 rơpŏng.
Hdrối vâ tơbleăng pêt hdrê pơkeăng kong Ngọc Linh, Tíu xiâm ngăn chiâk deăng tơring Tu Mrông tơrŭm ƀă mâu kăn cheăm ƀă khu mơdró hiăng tơkŭm mơjiâng mâu khu pêt pơkeăng kong; tơkŭm po lâm hnê khoa hok kih thuât; ăm mung hdrê pêt, phon rơvât, pơkeăng kơdê hdrong... ƀă hlối séa ngăn, tí tăng ngăn tung pơla pêt sâm dêi kuăn pơlê ki khât gá.
Tơring Tu Mrông xuân tơngah ing kơdrum pơkeăng kong Ngọc Linh 12 rơpâu xiâm ki Ngế pro xiâm hnê ngăn Chin phuh Phạm Minh Chính hbru ăm, Túa pêi cheăng rơpŏng kơtiê pêt pơkeăng kong Ngọc Linh kô tơbleăng troh lâp lu, cho xiâm vâ mơhnhôk kuăn pơlê po rơdâ tơnêi pêt nhâ pơkeăng ki kơnía kố.
Viết bình luận