-Ô pôa Vũ Đức Côn, Kăn phŏ ngăn ‘na Chiâk deăng ƀă Mơnhông thôn pơlê, Kăn hnê ngăn Khu tơrŭm pêt plâi sầu riêng Dak Lak tối, troh nôkố, Dak Lak hiăng vâ tâi rơnó krí plâi sầu riêng hơnăm 2023, mê pôa tối ăm ngin ‘nâi ki phá krê dêi tơdroăng krí a rơnó kố ga ti lâi?

Pôa Vũ Đức Côn:Tơdroăng ki phá má môi mê cho tơnêi tíu, chiâk deăng ki châ krí mê tâk châ 3 rơpâu ha. Yă tê tơmeăm xuâ hên ƀă tơmeăm khoăng hiăng châ luâ 200 rơpâu tâ̆n. Ki má péa, kuăn pơlê pêt loăng plâi sầu riêng châ krí xo ga xuân châ hên, ki ƀlêi chiâng mê ôh tá xê châ ‘nâi hdrối tung la ngiâ.

-Môi tiah pôa ai tối, hơnăm kố, kuăn pơlê hiăng châ krí dêi plâi hên, laga, mâu khu mơdró kâ ối trâm hên xahpá. Ô pôa, tơdroăng ki mê cho xua tơdroăng klâi?

Pôa Vũ Đức Côn:-Thâo mơni xua yă tâk kơnâ mê tơdroăng ki apoăng ga ai tơdjâk troh tơdroăng ki tơbriât tê mơdró kâ ôh tá hâi tơtro khât, tơdroăng ki tơbriât rôe, tơbriât tê ƀă hên hĕng mâu tơdroăng ki ê. Klêi mê, xua ing tơdroăng ki kơdo mơ-eăm vâ khoh châ pơkuâ ngăn mâu kơpong chiâk deăng ki kân rơdâ, la ôh tá hâi tơtro, khu mơdró kâ hiăng mơnhông ‘na tơdroăng pơkâ yă to kơnâ. Ki má péa, mê ai hên ngế tơbriât mot tung tê mơdró mơ’no tê kế rơmeăm, la tá hâi teăm châ ‘nâi hlê plĕng nhên mâu tơdroăng ki ối‘ro xua ing tơdroăng ki ôh tá hlê plĕng.

-Cho ‘nâng, tung tơdroăng ki tơ’lêi hlâu ƀă pá puât tiah nôkố, mê tung hơnăm apoăng pêi cheăng mê, Khu tơrŭm ngăn ‘na tê mơdró plâi sầu riêng kong pơlê Dak Lak hiăng ai pêi pro ki klâi troh tơdroăng cheăng?

Pôa Vũ Đức Côn: Khu pơkuâ ngăn ‘na tơrŭm cheăng mê hiăng châ mơjiâng pro ing khế 3 hơnăm 2023 troh nôkố, mê kơ’nâi mê, hiăng tơkŭm rup kŏng dêi pó pêi pro mâu tơdroăng cheăng ƀă ai tơdjâk troh tơdroăng ki tơ’lêi hlâu troh kơvâ tê mơdró kế tơmeăm, Ngin xuân môi tiah mâu khu râ, kơvâ cheăng po tơdroăng hôp, trâm mâ, tơpui tơno pơla khu mơdró ki tê rôe kế tơmeăm ƀă mơngế ki pêt; pơtối mê nếo cho péa pâ kong kan tung pơkuâ ngăn tơnêi têa, kơ koan ngăn ‘na tơdroăng cheăng. Ngin xuân hiăng pơtroh hên mâu tơdroăng cheăng ki ai tơdjâk troh ai tơdjâk ‘na kơvâ tê mơdró, mơ’no tối mâu tơdroăng ki pơtroh tiô troăng hơlâ, tơ’lêi hlâu, ki pá puât troh kơvâ tê mơdró plâi sầu riêng dêi Dak Lak.

-Pôa hôm chiâng ai tối tơbleăng ki klâi ‘na rơnó krí plâi sầu riêng Dak Lak hơnăm 2024? Mâu khu mơdró kâ tối tiah kố, ôh tá ton ing mê, kơxô̆ pơlâi sầu riêng dêi Dak Lak kô châ 500 rơpâu tâ̆n, ƀă bu ton dâng 2 khế, mê Dak Lak kô ai troăng hơlâ pêi pro ki nếo ga ti lâi, ô pôa?

Pôa Vũ Đức Côn:Mơni Dak Lak cho kong pơlê ki tơ’lêi hlâu tung mơnhông mơdêk má môi tung mâu kong pơlê ki veăng pêi ‘na kơvâ mơdró plâi kố. Maluâ ti mê, ki mơdêk dêi kong pơlê Dak Lak xuân tá hâi ai tơdjâk hên troh tơdroăng ki mơnhông pêi lo kế tơmeăm dêi lâp tơnêi têa tối krê ƀă mâu tơnêi têa ki veăng tê dêi plâi sâu riêng tối tơdjuôm. ƀă ki nhên ga, mê xuân ai tơdjâk troh tơdroăng tơdjuôm, la á hlo tiah kố, tá hâi teăm ai tơdjâk hên xua ing peăng Sinuâ xuân u ối hên. Pakĭng mê, pin xuân kal tơmiât troh tơdroăng mơnhông a mâu kơchơ ki nếo.

-‘Na túa cheăng tơkŭm ‘na kơvâ kố, ki rơhêng vâ tối cho tơrŭm cheăngtiô túa dêi logistics dêi kong pơlê Dak Lak, tâng vâ ngăn mê, hôm tơtro ƀă tơdroăng ki pêi lo kế tơmeăm tâk lơ ôh?

Pôa Vũ Đức Côn: Tro ‘nâng, cho khât mê cho ki tô tuăn má môi. Plâi sầu riêng dêi Dak Lak nếo châ mơnhông yâu dâng pơla 5 troh 6 hơnăm achê pơla kố. Mâu tơdroăng ki tơdjâk pơla mâu ngế pêt ƀă dêi pó xuân tá hâi teăm châ krá tơniăn, ƀă pơla mâu ngế pêt ƀă mâu khu tê mơdró kâ ki rôe vâ uâ mơdiê xuân tá hâi teăm châ krá khât. Ki ê nếo, mê mâu hngêi kơmăi ki uâ mơdiê dêi pin xuân tá hâi teăm châ mơnhông mơdêk. Kơtăn kố ai dâng 2 hơnăm mê kong pơlê xuân hiăng châ tăng hlo nhên kơvâ tê mơdró plâi sầu riêng mê cho kơvâ cheăng ki kal ƀă Khu kăn pơkuâ hnê ngăn Đảng, Vi ƀan hiăng hnê tối Khu ngăn ‘na chiâk deăng ƀă Mơnhông thôn pơlê pơtối pơkâ mơdêk tơdroăng mơnhông ki phá krê xêh dêi tơdroăng kố, mê cho athế seá mơnhên ngăn ƀă pơkâ tơdroăng ki pêi pêt, tung mê ai tá hdrê tá troh tơdroăng ki tơrŭm tê mơdró ƀă ki má pái mê cho thăm mơdêk tơdroăng tê mơ’no kế tơmeăm ƀă ki má pái nếo, pơtối mơdêk hnoăng cheăng dêi khu râ, kơvâ cheăng ƀă mâu kơ koan ki ngăn ‘na tơdroăng cheăng pơxiâm pêi pro tiô tơdroăng hnê mơhnhôk klêi kơ’nâi mê ai tá tơdroăng pâ thế mâu kơ koan mơjiâng pro kơvâ cheăng ki tơtro khât vâ pơkuâ ngăn tơdroăng tơrŭm cheăng kố.

-Hôm mơnê kơ pôa!