Kơchơ kố xua Khu ngăn kuăn pơlê pêi chiâk kong pơlê pơkuâ ngăn, châ mơjiâng krê ăm mâu túa cheăng kâ pú hên ƀă khu tơrŭm pêt mơjiâng kế tơmeăm. Kơchơ tê kế tơmeăm pêi lo ing chiâk deăng Dak Lak online kô pro tíu ki hriăn ngăn, tơbleăng, mơđah, tê kế tơmeăm ƀă inâi; tơrŭm pêt, tê mơdró ƀă hên ki ê tê tơdrêng ing troăng hyôh măng.

Kơchơ tê kế tơmeăm pêi lo ing chiâk deăng Dak Lak online  ối cho tíu ki ăm mâu khu mơdró kâ tăng ‘nâi xiâm kối, tíu pêt mơjiâng, inâi dêi kế tơmeăm tiô túa ki rĕng, tơdrăng. Tiô jâ Lại Thị Loan, Kăn hnê ngăn kuăn pơlê pêi chiâk kong pơlê Dak Lak, tơdroăng ki veăng pêi tung Kơchơ tê tơmeăm pêi lo ing chiâk deăng Dak Lak online kô mơdêk mâu khu tơrŭm, tôh tơrŭm cheăng, chi hô̆i, tôh pêi cheăng, kuăn pơlê pêi chiâk hbrâ mơdêk ki kơnía dêi kế tơmeăm pêi lo ing chiâk deăng tơniăn, tiô tro pơkâ ƀă chêh inâi dêi mâu kế tơmeăm.