Lô plâi mắc-ca tê ăm kong têa ê păng ‘nâng ki apoăng ăm kong têa Hàn Quốc hên lối 10 tâ̆n châ pêt a kong pơlê Dak Lak. Plâi kố hiăng tơkâ luâ hên tơdroăng séa ngăn dêi kơ koan ki rơkê ‘na séa ngăn oâ hdrong ki kâ ‘nhiê, ‘na ki tơniăn krúa, tơdroăng tâ kơxuô ƀă vâ tăng ‘nâi xiâm rêi ki pro ƀă pêt plâi. Tiô tối hdrối plâi kố kô châ tê a mâu siêu thị ki kân a Hàn Quốc.

Tối tơbleăng a rôh leh, pôa Huỳnh Ngọc Dung, Kăn phŏ pơkuâ ngăn ‘na Tê mơdró kong pơlê Dak Lak ăm ‘nâi: tơdroăng plâi mắc- ca châ tê păng ‘nâng ăm kong têa Hàn Quốc (klêi kơ’nâi tê ăm kong têa Nhuk) pá môi hdroh nếo po rôh ăm túa plâi ai kloăng kô cho tơmeăm kâ ki lĕm kơnâ dêi Dak Lak châ tê ăm mâu kong têa châu Á ƀă mâu kong têa tung lâp plâi tơnêi.