Hơnăm 2024, kơvâ ngăn ‘na chiâk deăng kong pơlê Dak Lak kơdo mơ-eăm, púi tơngah pơtối châ mơ’no tê dêi báu phái, prá, alâi, pôm, plâi hên tâ nếo troh a mâu tíu hơngế, kong têa vâi ê. Chêh tối dêi Hương Lý, Ngế chêh hlá tơbeăng cheăng tung Rơ’jíu Việt Nam kơpong Tây Nguyên ai mơnhên ‘na tơdroăng mê.

           Hơnăm 2023, kloăng mắc ca dêi Kŏng ti Tơlo liăn Damaca Nguyên Phương, tơring Krông Năng, kong pơlê Dak Lak hiăng ai mâ a tâi tâng mâu kong pơlê, pơlê kong kân tung lâp tơnêi têa ƀă tê ngi kong têa ê tiô troăng ki tê tơdrăng ngi kong têa Nhuk. Jâ Nguyễn Thị Thu Phương, Kăn pơkuâ kŏng ti ăm ‘nâi, vâ tơkâ luâ mâu tơdroăng xơpá ƀă pơloăng mơnúa dêi tơdroăng hơ’lêh cheăng kâ, tê mơdró hiăng hbrâ rơnáu châ kơxô̆ tơmeăm ing kơpong pêt, mơdêk rơdêi tơdjêp, po rơdâ kơchơ tê mơdró.

Hơnăm 2024, pakĭng tơdroăng ki mơdêk ki dâi lĕm, khu mơdró kâ pơtối tơtrŏng mơđah tơbleăng kế tơmeăm kố troh a mâu kơchơ tê mơdró, mâu kong têa ki vâ tê ki ai hlâu.

 “Ngin dế pêi cheăng ƀă mâu kong ki kân môi tiah Sinuâ ƀă mâu kong têa Arabia mê tơngah tung la ngiâ ah xuân châ xo mâu tơdroăng ki ro tơniăn dêi mâu kong têa ki kố vâ ai môi kơchơ tê mơdró tơniăn”.

Hơnăm kố, pakĭng mơnhông kơchơ tê mơdró tung tơnêi têa, Khu pêi cheăng tơrŭm pêi chiâk deăng tê mơdró Công Bằng Ea Tu, cheăm Ea Tu, pơlê kong kơdrâm Ƀuôn Ma Thuột, kong pơlê Dak Lak, pơtối tơmiât troh kơchơ tê mơdró tê ngi kong têa ê ing mâu kế tơmeăm kơphế ki dâi lĕm ƀă kơphế ki lĕm. Pôa Trần Đình Trọng, Kăn hnê ngăn Hô̆i đong quản trị hlối cho Kăn pơkuâ khu pêi cheăng tơrŭm ăm ‘nâi, pêt kơphế lĕm hiăng mơdêk ki kơnía dêi kloăng kơphế, pro pơxúa khât ăm kuăn pơlê pêi chiâk drêng yă kơphế đi đo tơniăn ƀă to kơnâ tâ tâng pơchông ƀă kơchô mơdró ing 2 – 2,5 rơtuh liăn tung môi tâ̆n.

Nôkố, Khu pêi cheăng tơrŭm Pêi chiâk deăng tê mơdró Công Bằng Ea Tu dế bro túa pơkâ pêi pro hơ’lêh kế tơmeăm tiô tơdroăng pơkâ thế dêi kơchơ tê mơdró, rế hía rế mơdêk ki dâi lĕm dêi kế tơmeăm ing tơdroăng ki pêt uâ pơliê kơphế ki lĕm.

“Nếo a chê kố ngin hiăng pro châ mah tâ tung tơdrong ăm kơphế kloăng kơ-óu, kơphế tơpoăng ƀă kơphế hơ’lâk vâ tê ngi kong têa Sinuâ. Ƀă kơphế ki dâi lĕm ƀă kơphế ki kơhiâm lĕm rế hía rế hên ngế hâk vâ ôu tơdroăng kố cho tơ’lêi hlâu ƀă cho tơniăn tro khât ăm kuăn pơlê ki pêi chiâk deăng. Ngin xuân hnê pơchân mâu ngế ki pêi chiâk deăng athế rak vế túa pơkâ pêt ki tro, pôi tá xúa pơkeăng xôh kơdê oâ hdrong hên luâ râ, pôi tá xúa pơkeăng kơdê nhâ mê kô krá tơniăn”.

Tiô pôa Nguyễn Hoài Dương, Kăn pơkuâ Khu ngăn chiâk deăng ƀă Mơnhông thôn pơlê kong pơlê Dak Lak, hơnăm 2023 cho môi hơnăm ƀlêi chiâng dêi kơvâ pêi chiâk deăng kong pơlê drêng ki rơdêi mơdêk châ a kơlo 4,88%. Kố cho kơlo ki tâk hên má môi tung mâu kơvâ cheăng kâ dêi kong pơlê. Rơtế amê, tơdroăng ki yă tê dêi mâu kế tơmeăm pêi lo ing chiâk deăng môi tiah: sầu riêng, kơphế, tiu, báu phái to kơnâ ƀă Dak Lak mơdêk rơdêi tơdroăng ki tê tơmeăm tiô troăng tê tơdrăng tung mâu kong têa mê ki kơnía pêi châ liăn dêi vâi krâ nhŏng o ki pêi chiâk, mâu ngế ki pêi lo mâu kế tơmeăm kố xuân châ hơ’lêh hên, tâk 15 rơpâu rơtal tâng pơchông ƀă hơnăm 2022. Kơxô̆ liăn châ xo ing tê tơmeăm ngi kong têa dêi kong pơlê rôh apoăng troh a kơlo 1,6 rơtal dollars Mih.

Hơnăm 2024, kong pơlê Dak Lak pơtối mơdêk rơdêi tung tơdroăng ki pêt kế tơmeăm tung chiâk deăng, malối cho tơtrŏng po rơdâ kơchơ tê mơdró vâ tê tơmeăm ngi kong têa ê mâu kế tơmeăm pêi lo ing chiâk deăng ki xiâm, kong pơlê tơngah kô veăng kum ăm cheăng kâ rêh ối pơlê pơla dêi kong pơlê rế mơnhông. Vâ pêi pro hơ’lêh tơdroăng tơngah kố, Pôa Nguyễn Hoài Dương, Kăn pơkuâ Khu ngăn chiâk deăng ƀă Mơnhông thôn pơlê kong pơlê Dak Lak, ăm ‘nâi:

"Kơchơ tê mơdró cho tơdroăng ki pơkâ mâu tơdroăng. Hơnăm 2024, kơvâ cheăng kô hriăn ngăn 16 khu tơrŭm tê mơdró tơniăn krê ki Việt Nam hiăng kĭ tơkêa ƀă mâu kơpong, mâu kong têa vâ xúa mâu tơdroăng ki ai hlâu mâu tơdroăng ki pơxúa ing mâu khu tơrŭm tê mơdró tơniăn krê kố ƀă hriăn ngăn mâu kơpong ki ai mâu tơdroăng ki rơhêng vâ roê xo  tơmeăm ing Việt Nam ki Dak Lak ai hên vâ ing mê pơkâ troăng pêt rak vế châ tơdroăng ki rơhêng vâ tro pơkâ dâi lĕm dêi mâu kơchơ mơdró  vâ ing mê mơdêk ki kơnía ƀă tơdroăng tê krá tơmiăn".