Ƀă tơnêi tơníu ƀă kong kế hiăng ai hlâu, kong pơlê Gia Lai hiăng mơjiâng ƀă mơjiâng hên kơdrum pêt mơjiâng tơmeăm pêi lo ing chiâk deăng tơkŭm, xúa kŏng ngê̆ kum ăm kơmăi kơmok uâ mơdiê ƀă tê ngi kong têa ê. Hên tơmeăm pêi lo ing chiâk deăng ki xiâm kơnâ khât hiăng tê troh 40 kong têa, kơpong tơnêi tơníu. Nôkố kong pơlê ai 3 kơpong hngêi kơmăi kơmok, ƀă pơkâ pêi 23 kơpong hngêi kơmăi kơmok. Tơmeăm pêi lo ing chiâk deăng tung kong pơlê hên hĭn, tơniăn môi tiah: Kơphế, kơxu, sik, pôm loăng, chế, plâi kâ ƀă hía hé mơjiâng xiâm kối vâ mơnhông kơmăi kơmok uâ mơdiê pro.

Lâp kong pơlê ai lối 8.000 tíu pêi cheăng tung kơvâ kơmăi kơmok uâ mơdiê ƀă hía hé. Tơmeăm khoăng hên laga tiô pôa Phạm Văn Binh, Kăn pơkuâ Khu pơkuâ ‘na Kơmăi kơmok ƀă tê mơdró Gia Lai, mâu tơdroăng mơdró logistics tung kong pơlê tá hâi mơnhông xua ối hên tơdroăng ki mơdât.

 ‘’A kơvâ ki lâi xuân ai tơdroăng pá puât, pơkâ pêi mê tá hâi kêi đeăng tâi tâng, má péa nếo mơhé kơmăi kơmo ai tơdjêp laga hngêi trăng troăng klông tơmeăm khoăng vâ kum ăm logistics xuân ối iâ. Kơxô̆ mơngế pêi cheăng mê iâ ƀă tá ‘na tơdroăng hlê plĕng tŭm ‘na logistics xuân tá hâi hlê plĕng hên’’.

A Hneăng hôp, kăn teăng mâ mâu tíu cheăng ối tung Khu xiâm pơkuâ Kơmăi kơmok tê mơdró, khu tơrŭm mâu kơvâ cheăng ƀă mâu khu mơ’no liăn cheăng, khu tê mơdró hiăng tối hên rơkong tơpui vâ mơnhông tơdroăng pêi cheăng logistics a Gia Lai. Mâu kăn teăng mâ tối kal mơdêk tâ mê nếo hlê plĕng ‘na logistics, hnoăng pêi cheăng logistics ƀă mơnhông cheăng kâ – rêh ối pơlê pơla, mơnhên troăng mơjiâng tơmeăm khoăng tê mơdró ƀă mơdêk mơjiâng troăng pêi logistics ƀă tơrŭm cheăng pơla mâu khu tê mơdró tung, pakong kong pơlê.

Pôa Lê Quang Trung, Kăn phŏ Hnê ngăn Khu tê mơdró tơdroăng Logistics Việt Nam tối:

“Ƀă Gia Lai lơ Tây Nguyên tơnêi tơníu, kế tơmeăm khoăng cho hên, mâu khu tê mơdró thế xúa ki ai tơ’lêi hlâu mê kơpong kong ngo, xúa troăng hơlâ dêi tơnêi têa tung tơdroăng tŏng kum, mơnhông mâu khu tê mơdró dêi mơngế hdroâng kuăn ngo. Tơdroăng tơrŭm pơla troăng hơlâ ƀă pêi pro nhên cho tíu mơdêk ki kal vâ la ngiâ mâu tơdroăng tơkŭm. Kal ai tơdroăng tơdjêp lĕm pơla mâu khu tê mơdró Logistics tung tơdroăng pơtroh, tơdjêp ƀă mâu khu mơjiâng pro klêi kơ’nâi mâu tơdroăng pơto ƀă chôu ‘măn tung hnôu’’.

Tiô pôa Trần Thanh Hải - Kăn phŏ Kơ koan xiâm tê rôe tơmeăm ngi kong têa ê, Khu xiâm pơkuâ kơmăi kơmok tê mơdró, vâ mơnhông tơmeăm ki mơnhông, tơ’lêi hlâu, Gia Lai kal ai mâu troăng pơkâ pêi, troăng hơlâ ki hôm, chiâng khât vâ mơhnhôk mâu khu ngế pơlê pơla, mâu grup, khu tê mơdró ki loi tơngah, ai ivá, túa pêi cheăng rơkê tơtro tung mơ’no liăn cheăng, mơjiâng tơdroăng pêi cheăng logistics.

“Mơhnhôk mâu khu tê mơdró po mâu tíu pêi cheăng kuăn, mơjiâng tíu pêi cheăng a Gia Lai kô kum châ tê tơmeăm. Vâ krếo khu tê mơdró mê kong pơlê thế ai tơdroăng pêi ki nhên djâ tiô tơdroăng krếo ƀă tŏng kum. Pơtih kô chiâng tơkŭm po mâu khu tơbleăng mơ’no liăn cheăng, mơdêk tâ mâu tơmeăm dêi kong pơlê a mâu kong pơlê kân dêi Việt Nam xuân môi tiah tơdjêp ƀă mâu kong pơlê pú hmâ Lếo, Kul xuân kal khât vâ rơtế dêi rơpó xúa mâu tơmeăm ki ai hlâu’’.

Vâ pơtối mơnhông châ tơƀrê mâu tơmeăm ki hiăng ai, ai hlâu, mơdêk kơvâ logistics mơnhông mơdêk rĕng ƀă krá tơniăn, veăng kum hên, châ tơƀrê tâ tung mơnhông mơdêk tơdjuôm dêi kong pơlê, ƀă hnoăng cho kơ koan pơkuâ tơnêi têa ‘na tơdroăng cheăng logistics, ‘na peăng Khu xiâm pơkuâ kơmăi kơmok tê mơdró, pôa Trần Thanh Hải pơkâ thế, khu râ kăn pơkuâ kong pơlê Gia Lai pơtối hlê plĕng pêi pro trâu hơngế mâu troăng tơmiêt pêi, troăng prôk la ngiâ a Pơkâ 163 dêi Chin phuh ‘na mơdêk mơnhông tơdroăng cheăng logistics Việt Nam ƀă mâu pơkâ, troăng hơlâ, troăng pêi ton xŏn mơnhông mơdêk dêi Đảng, Tơnêi têa, Chin phuh ai tơdjâk troh kơpong Tây Nguyên vâ pro tiô pơkâ ƀă tơkŭm pêi pro châ tơƀrê mâu tơdroăng pêi, pơkâ pêi, tơdroăng tơkêa bro ‘na mơnhông tơdroăng cheăng logistics tơniăn tơtro ƀă tơdroăng nôkố ƀă xúa mâu tơmeăm ki ai hlâu, ki rơdêi dêi kong pơlê.