Drêng kố, troh ƀă mâu kơpong hơngế hơngo, kơpong cheăm Dà Sar, Dà Nhim, tơring Lạc Dương, kong pơlê Lâm Đồng kô châ hlo mâu kơdrum atiso drêh ngiât rơdâ a kối ngo dêi kuăn pơlê hdroâng kuăn ngo. Mâu rơpŏng kuăn pơlê tíu kố hluăn ing kơtiê ing pêt loăng pơkeăng. Nâ Liêng Jrang K’Sáu, ối a thôn 6, cheăm Dà Sar, tơring Lạc Dương tối ăm ‘nâi, hdrối nah bu hmâ ƀă tơdroăng pêt kơphế ƀă mâu kơchâi drêng iâ hâi, pêi lo liăn ôh tá tơniăn.

Châ tơdroăng tŏng kum ƀă mơhnhôk dêi khu râ kăn pơkuâ, rơpŏng nâ hiăng veăng Tôh tơrŭm cheăng pêt loăng pơkeăng atiso ƀă khên tơnôu pơ’lêh lối 3 sao tơnêi pêt mơnúa. Châ tơdroăng tŏng kum ‘na hdrê ki dâi lĕm, phon rơvât ƀă kih thuât pêt, klêi kơ’nâi 4 khế sap ing pêt, nâ hiăng pêi lo châ lối 10 rơtuh liăn. Nâ Liêng Jrang K’Sáu tối ăm ‘nâi:

“Tơdroăng pêt xúa phon vi sinh, phon eâk ro, ôh tá xúa phon ká rơvât atiso. Loăng ki kố ăm xo hlá, pế vâ ôu chế ƀă pro pơkeăng xua mê ôh tá xúa pơkeăng. Kŏng ti chêh inâi pơkeăng cho thế pêi tiô’’.

Tung pơla kố nah, hên kuăn pơlê hdroâng kuăn ngo a cheăm Dạ Sar, cheăm Dà Nhim, tơring Lạc Dương, kong pơlê Lâm Đồng hiăng hluăn ing kơtiê kơnôm atisô, tơdjêp tơdrêng ƀă khu tê mơdró. Kuăn pơlê pêi pro pơ’lêh ƀăng deăng pêt kơphế hiăng krâ, pơ’lêh pêt atisô. Klêi kơ’nâi 4 khế, loăng pơxiâm ăm xo hlá ƀă châ kŏng ti rôe tâi tâng. Rêm măng tĭng, khu mơngế pêi ‘na kih thuât dêi khu tê mơdró pơrá lo a chiâk rơtế kuăn pơlê séa ngăn loăng pơkeăng, hnê mơhno kih thuât rak ngăn.

Tơdrêng amê, kuăn pơlê châ tŏng kum phon rơvât, kih thuât rak ngăn ƀă kêi xo hlá. Troh nôkố, lâp tơring Lạc Dương mơjiâng 3 tơdroăng tơdjêp pêt mơjiâng ƀă tê ki hên cho tơmeăm pơkeăng atiso. Pôa Sử Thanh Hoài, Kăn pơkuâ hnê ngăn cheăng Đảng tơring Lạc Dương tối ăm ‘nâi, mâu troăng pêi tung tơring pơrá tiô troăng kuăn pơlê veăng pêt mơjiâng, tơdjêp tơdrêng ƀă khu tê mơdró rôe tâi tâng:

“Nôkố ngin mơnhên dâng 1.000 met karê tung 1 hơnăm, riân kơxô̆ liăn mơ’no rak ngăn kuăn pơlê ối pêi lo châ liăn rơkâ sap ing 25 troh pái chât rơtuh liăn. Kố cho loăng plâi ki tơtro ƀă kong prâi, tơnêi tơníu, pêt dêi kuăn pơlê nôkố, ngin dế tơpui po rơdâ. Kô chiâng tối tiah kố mê tơleăng chiâng hên tơdroăng cheăng kuăn pơlê. Khu tê mơdró pơkuâ troăng pêt mơjiâng ƀă rôe tâi tâng tơmeăm. Kố xuân cho môi troăng prôk ki tơring Lạc Dương hiăng pơtroh vâ tơniăn dâi lĕm tơdroăng rêh ối kuăn pơlê ƀă mơngế rôe xúa’’.

Rơtế ƀă tơdroăng xúa troăng pêi tiô pơkâ mê tơdroăng tơdjêp pêt mơjiâng rế hía rế châ po rơdâ vâ tơniăn tíu tê cho kal khât ăm mơngế ki pêt xuân môi tiah ki dâi lĕm tíu tê ăm mâu khu tê mơdró uâ pro xuân kal khât. Pôa Hoàng Sỹ Bích, Kăn pơkuâ Khu pơkuâ ‘na pêi chiâk deăng ƀă mơnhông thôn pơlê kong pơlê Lâm Đồng tối ăm ‘nâi, troăng pêi ki xiâm sap ing kố troh hơnăm 2030 cho tơkŭm pêt mơjiâng ƀă tê tơmeăm atiso tối krê ƀă mâu loăng plâi pơkeăng ai ivá mơnhông tung tơring tối tơdjuôm.

Tơkŭm xúa kŏng ngê̆ rơkê, tiô rơxông nếo tung hriăn plĕng rah hdrê ƀă kih thuât pêt, rak ngăn ăm pêi lo, ki dâi lĕm tung pêt mơjiâng, uâ mơdiê pro, vâ mơjiâng mâu pơkeăng ai ivá tơbriât tung kơchơ mơdró. Tơdrêng amê, mơdêk xúa kŏng ngê̆ thông tin tung pơkuâ, hnê mơhno ing pêt troh mơjiâng pro, uâ mơdiê, xúa mâu tơmeăm pơkeăng; tŏng kum kĭ inâi mơdró, tĕm inâi, mah kơpong pêt, ua mơdiê ƀă tê tơmeăm pơkeăng, tơniăn mâu pơkâ tơtro, pơkâ dêi tơnêi têa, lâp plâi tơnêi tung kơchơ mơdró tung tơnêi têa ƀă tê ngi kong têa ê:

“Pakĭng tơdroăng ki tơbleăng kố, klêi mê pơkuâ, xua mê tơdroăng pêi pro pơkuâ, séa ngăn ki dâi lĕm tơmeăm xuân châ tơmâng hên. Laga ngin xuân ai môi pơkâ dêi kơvâ pêi chiâk deăng ƀă mơnhông thôn pơlê vâ pêi pro tơdroăng pơkuâ, séa ngăn ki dâi lĕm tơmeăm pêi lo ing chiâk deăng mơjiâng, mơnhông ƀă gâk kring inâi’’.

Ki nhên khât a hên kong pơlê ăm hlo, ki kơnâ cheăng kâ djâ pơxúa ing tơdroăng pêt loăng pơkeăng hên tâ tâng pơchông ƀă mâu loăng kâ ki ê. A hên cheăm, loăng pơkeăng atiso ôh tá xê to hiăng châng loăng xăm kơklêa, kơdroh kơtiê mê ối kum hên rơpŏng a Lâm Đồng ai pêi lo liăn hên, mơ-eăm pro kro mơdrŏng.