Mâu rơkong ki veăng tơpui tối a rôh hôp hiăng rơtế ƀă dêi rơpó tối ƀă tơpui trâu rơdâ ‘na mâu ivá mơ-eăm dêi Việt Nam ƀă Mih tung tơdroăng ki thăm séa ngăn hbrâ mơdât tơdroăng cheăng keo tê mơdró loăng ôh tá tro luât; tí tăng ‘nâi plĕng mơjiâng túa pơkâ pêi pro tung la ngiâ vâ rế hía rế mơdêk tơrŭm tê mơdró trâu rơdâ tâ ing tơdroăng ki mơjiâng mâu túa luât rơdêi, pơkuâ ngăn tơdroăng ki ôh tá mơhúa tơtro ƀă pêi pro mâu troăng hơlâ hbrâ mơdât kếo ko ƀă tê mơdró loăng ôh tá tro luât.

Hơnăm 2023, ƀăng tơnêi kong dêi Việt Nam châ 14,8 rơtuh ha, tung mê ai 10,1 rơtuh ha kong ki chiâng xêh ƀă 4,65 rơtuh ha kong loăng pêt, ƀă kơxô̆ loăng ki pro xâp rơngiâp châ 42%. Mâu kong loăng pêt, loăng pêt tơprâ tơprŭng tung tơnêi têa pêi pro châ tơdroăng ki vâ xúa dâng 80% vâ uâ, tê tung tơnêi têa ƀă tê ngi kong têa ê.

Po tung pơla 4 hâi ing hâi lơ 4 troh lơ 7/3, ing mâu rôh hôp tơpui tơno ki trâu rơdâ; tơpui tơno tơdrăng, rôh hôp kô tối tơbleăng ƀă tơpui troh mâu rêm pâ ki ai tơdjâk troh mâu tơdroăng ki kal ‘na pơkuâ ngăn loăng ƀă kế tơmeăm loăng dêi Việt Nam, Mih ƀă Khu tơrŭm Châu Âu, tơmiât troh tơdroăng vâ pêi mơjiâng kơvâ loăng tro luât, krá tơniăn tung la ngiâ.