Rơpŏng jâ Ngô Thị Khải, kuăn pơlê ối a thôn Đình Tổ, pơlê kong krâm Thuận Thành, kong pơlê Bắc Ninh cho môi tung mâu rơpŏng châ bro tíu tơbleăng túa pơlâ klâ rah mâu xok hvât a tíu tiô pơkâ mơjiâng thôn pơlê tiô túa pơkâ. A rơpŏng, xok châ klâ bro 3 kơthung krê – kơthung ki tâ mâu xok ki chiâng vêh bro nếo, tung mê cho, kong kếo, kơ’lo chhá, mơ-éa, meăm ƀă hên ki ê kơthung tâ xok vô cơ ƀă kơthung tâ xok hữu cơ.

Krê mâu xok hưh cơ rơpŏng kô xúa kế ki bro sinh hok EMO vâ bro vâi chiâng phon rơvât ăm loăng pêt. Jâ Ngô Thị Khải tối, túa pơkâ kố châ kuăn pơlê môi tuăn khât xua veăng rak vế kơpong rêh ối đi đo krúa lĕm, kơdroh mâu xok hvât a gong:

“Á cho môi ngế đảng viên đi đo djâ troăng ahdrối ‘na hnoăng cheăng rak tơniăn tơnêi tơníu kong prâi. Malối tung rơpŏng hngêi, nhŏng o, kuăn pơlê pêi pro tơdroăng ki klâ rah xok a rơpŏng hngêi. Tung rơpŏng hngêi tơná mê á klâ rah mâu xok bro chiâng pái túa. Mâu xok hvât môi tiah kơchâi pía, hmê phong mê á ‘măn gá krê môi tíu klêi mê á xúa vâ pro kế ki bro EMO vâ xúa têa êak ki mê tôh ăm kơchâi tâng xo hên mê á rơvât ăm tá báu”.

Cheăm Đình Tổ, pơlê kong krâm Thuận Thành, kong pơlê Bắc Ninh hiăng pêi klêi tơdroăng mơjiâng thôn pơlê nếo a hơnăm 2021. Pơkâ tơleăng mâu tơdroăng ki ‘mêi xua xok hvât hmâng vâ, trếo mơ’no sap ing mâu rơpŏng ki păn chu, păn í, mâu kơpong mơjiâng bro kế tơmeăm cho troăng hơlâ ki kal vâ cheăm Đình Tổ pêi pro vâ ‘mâi rơnêu tơdroăng ki ‘mêi kong prâi tơnêi tơníu tung lâp pơlê pơla.

Laga, tiô tơdroăng pơkâ tung pơla hơnăm 2021 – 2025, tơdroăng pơkâ kơxô̆ 17 ‘na kong prâi tơnêi tơníu ƀă tơniăn krúa kế kâ ai hên tơdroăng pơkâ thế tâ ƀă xơpá pêi pro. Mâu tơdroăng ki xơpá kố dế châ cheăm tơkŭm tŏng kum pơkâ tơleăng.

Pôa Nguyễn Văn Thành, Kăn hnê ngăn Vi ƀan cheăm Đình Tổ tối:

“Nôkố, ngin xơpá khât cho prâu tah mâu xok ki ‘măn tơkŭm tung kơpong kuăn pơlê rêh ối. Ki má péa nếo, mê cho xơpá ‘na tơdroăng pơkâ ki krúa lĕm dêi kong prâi tơnêi tơníu. Nôkố tiô tơdroăng pơkâ ki nếo, athế ai lối 65% kơxô̆ rơpŏng athế châ xúa têa krúa ing mâu tíu ki mơ’no têa tơkŭm. Tiô tơdroăng pơkâ ki ton mê bu kal mâu rơpŏng xúa têa tro tơdroăng, rak tơniăn krúa lĕm gá hôm”.

Hdrối kố nah, ƀă tơdroăng pơkâ kong prâi tơnêi tơníu dêi cheăm thôn pơlê nếo, bu kal kuăn pơlê ai troăng hơlâ prâu tah tâp kơđu, gô̆m ‘măn xok môi tíu gá hiăng hôm. La tiô pơkâ cheăm thôn pơlê nếo pơla hơnăm 2021 – 2025, pơklât thế iâ hlái 30% rơpŏng kuăn pơlê tung cheăm athế pêi pro klâ rah xok a tíu ki vâi ‘măn tơkŭm, mâu xok chhá ki hvât gô̆m môi tíu, xok ki chiâng vêh vêh bro nếo, xok ki bro kế ki ê, bro tiô pơkâ cha sap ing tơdế.

Kố cho tơdroăng ki ôh ti xê tơ’lêi hlâu klâi. Jâ Hoàng Thanh Bình, Kăn phŏ hnê ngăn Vi ƀan cheăm Cao Đại, tơring Vĩnh Tường, kong pơlê Vĩnh Phúc ăm ‘nâi: Vâ tŏng kum tơdroăng xơpá ăm tơdroăng pơkâ kong prâi tơnêi tơníu tung mơjiâng thôn pơlê nếo, Đảng ủy, Vi ƀan hnê ngăn cheăm pơtroh kăn ƀô̆ ki rơkê lăm chu troh a cheăm tíu ki mê tơrŭm ƀă cheăm hnê mơhno, tŏng kum mâu tơdroăng ki xơpá tơvâ tơvân tung pơla tơbleăng pêi pro.

Tơdrêng amê, hlối tơkŭm po hên tơdroăng pêi pro pơxúa tơtro ƀă rôh mơhnhôk”mơjiâng rơpŏng hngêi 5 ôh 3 krúa” – xo đảng viên ƀă kuăn pơlê cho xiâm rêm râ hô̆i cho khu ki pêi tung hnoăng cheăng hnê tối, djâ troăng ahdrối tung pêi pro.

“Đảng ủy Vi ƀan ngin xuân pơcháu ăm mâu khu ngăn vâi kơdrâi, khu ngăn kuăn pơlê pêi chiâk, mâu ngế ki pơkuâ tôh tơrŭm, mâu vâi pú Đảng viên tung chi ƀô̆ cho mâu ngế ki djâ troăng ahdrối tung hnoăng cheăng hnê tối vâ ngin pêi pro tíu pơkâ hdrối. Klêi mê ngin nếo po rơdâ. Troh nôkố kuăn pơlê hiăng mơjiâng chiâng tơdroăng ki hmâ klâ rah xok a tíu ki vâ bro phon compot”.

Châ mơnhên tối cho tơdroăng pơkâ “iâ liăn” ôh ti kal hên liăn ‘no pêi cheăng sap ing tơnêi têa, laga tơdroăng pơkâ kong prâi tơnêi tơníu ối cho tơdroăng ki xơpá ƀă hên kong pơlê. Tiô pôa Phùng Xuân Tiến, kăn pơkuâ Ƀơrô xing xoăng tơdroăng mơjiâng thôn pơlê nếo Vĩnh Phúc, vâ pơkâ tơleăng tơdroăng ki xơpá kố, khu kăn pơkuâ athế djâ troăng ahdrối, thăm nếo khên tí tăng mâu tơdroăng pơkâ ki nếo rĕng pêi klêi.

Pakĭng mê, athế mơhnhôk veăng tơlo mâu kơxô̆ liăn, mơdêk rơdêi tơdroăng pơlê pơla hơ’lêh, tơdroăng ki veăng dêi mâu khu ki cheăng kâ ‘no liăn cheăng ăm hnoăng cheăng rak vế kong prâi tơnêi tơníu:

“Tơdroăng ki tơ’mot tơdroăng ki veăng dêi kuăn pơlê, khu mơdró kâ cho kal khât. Tâng pin pêi tro hnoăng cheăng hơ’lêh pơlê pơla, mơhnhôk tơdroăng ki veăng kum dêi khu mơdró kâ, khu tơrŭm mâu ngế krê; Mơhnhôk châ tơdroăng ki dêi kuăn pơlê mê mâu tơdroăng pơkâ ‘na mơhno túa lĕm tro, tơnêi tơníu kong prâi, têa krúa ƀă hên ki ê kô châ tơbleăng tơƀrê”.

‘No liăn pêi cheăng, pơkâ mơ’no tơdroăng pơkâ ƀă hnê mơhno nhên pêi pro tơdroăng pơkâ kong prâi tơnêi tơníu tung mơjiâng thôn pơlê nếo, kố cho troăng hơlâ tŏng kum xơpá ăm tơnêi tơníu rêh ối a mâu cheăm pơlê thôn pơlê rế hía rế châ hơ’lêh.