Tung mâu hâi ki kố, rơpŏng hngêi ngoh Đinh Công Nhiên rơtế ƀă kuăn pơlê tung pơlê dế phiu ro châ pôe xo dêi báu a ƀăng klâng Klah, cheăm Ia Mơr, tơring Chư Prông, kong pơlê Gia Lai. Ngoh Đinh Công Nhiên ăm ‘nâi, kơtăn kố 2 hơnăm, mâu kăn ƀô̆ ngăn ‘na chiâk deăng dêi tơring, cheăm hiăng troh a pơlê hnê kuăn pơlê pơhlêh pêt báu klâng pêi 2 rơnó. Kuăn pơlê châ mâu kăn ƀô̆ hnê ing po tơnêi, xế, mơdâ, pêt, rak ngăn troh pôe báu. Báu hơnăm kố, Đinh Công Nhiên púi châ 5 tâ̆n tê châ 50 rơtuh liăn.

“Hdrối nah hâi ai rơchôa têa bú pêi môi rơnó ôh tá châ hên tơ’mô ƀă pêi péa rơnó, pêi báu péa rơnó châ tâ. Hơnăm kố, rơnó kố nếo cho rơnó má pái, lối môi khế nếo kô châ pôe. To lâi hơnăm hdrối nah pêi báu môi rơnó ôh tá bê kâ, nôkố hiăng bê’’.

Troh a cheăm tơkăng kong Ia Mơr pơla kố, tơdroăng pêi cheăng hlo ro, tơdroăng rêh ối dêi kuăn pơlê hiăng pơ’lêh. Hâk ro báu kơpâu hên kloăng kân lĕm hbrâ vâ pôe dêi, ngoh Siu Toàn, ối a pơlê Klah, cheăm Ia Mơr ăm ‘nâi,  rơnó pêi báu hơnăm kố, rơpŏng hngêi po rơdâ klâng sap 3 sao nah  nôkố tâk châ 8 sào klâng. Pakĭng mê, pơhlêh pêt hdrê báu ki nếo ƀă tơngah hơnăm kố kô kum rơpŏng hngêi châ xo dêi báu hên’’. Ngoh Siu Toàn tối:

“Hdrối nah hâi ai rơchôa têa mê rơpŏng hngêi a ôh tá pêi klâng, la nôkố klâng hiăng ai têa, xua châ Tơnêi têa ‘no liăn kâng pro rơchôa mê kuăn pơlê a kố hmiân tuăn pêi klâng, mê a xuân thế mơ-eăm pêi vâ ai hmê kâ, ai ếo xâp, păn chĕm mơ’rêh dêi kuăn ‘nĕng ăm dêi kuăn ‘nĕng hriâm ƀă tơniăn tung rêh ối tung rơpŏng hngêi”.

A ƀăng klâng báu pơlê Klah, pôa Nguyễn Tuấn Anh, Kăn phŏ hnê ngăn Vi ƀan kuăn pơlê cheăm Ia Mơr hdôu dêi hmân chu lâ tung klâng hnê kuăn pơlê pêi klâng, mơdâ pêt báu. Pôa Nguyễn Tuấn Anh ăm ‘nâi, cheăm nôkố ai lối 155ha báu klâng, bú tung péa hơnăm hdrối kố nah, krê pơlê Klah ai lối 100 ha báu pêi 2 rơnó, rơpŏng hngêi ối, pêi rơnó má 3’’.

Kơnôm pơhlêh pêi báu klâng, cheăm Ia Mơr hiăng ai hmê kâ, kuăn pơlê ôh tá kơklêa xếo. Ƀă 5 thôn pơlê, kơxô̆ mơngế kuăn ngo châ 70%, báu klâng hiăng kum vâi pơhlêh tuăn tơmiât tung pêi klâng chiâk, hơnăm kơ’nâi kơxô̆ rơpŏng kơtiê rế kơdroh ttâ hơnăm hdrối. Pôa Nguyễn Tuấn Anh tối:

“Nah ƀăng klâng báu pơlê Klah bú pêi môi rơnó kơnôm to têa mêi, kuăn pơlê trâm hên xơpá ‘na mơnhông cheăng kâ ƀă malối pêt báu klâng. Drêng hiăng ai rơchôa hiăng châ xúa têa tôh báu kâng dêi pơlê, mê pơlê hiăng pơhlêh tuăn tơmiât túa pêi cheăng dêi hdroâng kuăn ngo tung mơnhông cheăng kâ, kơdroh kơklêa xăm kơtiê. Tơdroăng kố tro ƀă troăng rơhlâ Pơkâ 08 dêi khu kăn pơkuâ hnê ngăn Đảng kong pơlê, ing mê châ 9 tâ̆n báu ối drêh/ha. Kuăn pơlê hlo tơƀrê tung mơhnhôk mâu thôn pơlê pơhlêh túa pêi cheăng kâ ƀă xúa khoa hok kih thuât túa pêi cheăng ki nếo tung mơdâ pêt rak ngăn báu xông dâi lĕm kơpâu hên mê kuăn pơlê hlo tơƀrê’’.

Vâ mơhnhôk pêi báu klâng a kơpong tơkăng kong, tơring Chư Prông hiăng ai hên luât pơkâ tŏng kum. Pôa Đinh Văn Dũng, Kăn hnê ngăn tơring Chư Prông ăm ‘nâi, tơring kơjo kum hdrê pêt, phon rơvât vâ mơhnhôk kuăn pơlê pơhlêh pêt báu klâng ăm kơpâu hên; hnê kuăn pơlê xúa khoa hok kih thuât ki rơkê nếo hlối ‘nâi kơdĭng, báu hlối xông dâi lĕm, kơpâu hên. Mâu tơdroăng ki mơ-eăm mê hiăng pro pơxúa tơƀrê tơxâng hâk mơnê.

“Hnê ăm rêm râ pơkuâ hnê ngăn Đảng, rêm râ kơvâ cheăng vâ tơbleăng tơkŭm pêi lâp lu, tơmâng ngăn nhên a tơdroăng pêi klâng chiâk dêi kuăn pơlê vâ pơ’lêh túa pêi cheăng ki nếo, râng kŏng hnê rơkong tơpui tung tơdroăng pêi klâng’’.

Ƀă tơdroăng pơ’lêh tơná rơdêi tung pêi báu klâng, kuăn pơlê Klah, cheăm Ia Mơr hiăng tơkâ luâ tơdroăng xơpá, hrâ mơnguâ kơtiê vâ châ ai tơdroăng rêh ối phâi tơtô tâ. Mâu ƀăng klâng báu drêh lĕm ôh tá xê to xiâm báu phái ki kơnía mê ối cho tơdroăng ki hâk tơngăm, cho vâ mơhno ki kơdôu mơ-eăm dêi kuăn pơlê hdroâng kuăn ngo rêh ối a kơpong tíu tơkăng kong.