Tơdroăng pơkâ ‘na pôk pôa Trần Thanh Mẫn, Kăn xiâm hnê ngăn Kuô̆k hô̆i hneăng 15 hiăng châ mâu kăn Kuô̆k hô̆i têk kŏng tơbleăng ƀă 475/475 ngế kăn veăng têk kŏng môi tuăn (châ 97,54% tung tâi tâng mâu kăn Kuô̆k hô̆i). Pôa Trần Thanh Mẫn, Kăn xiâm hnê ngăn Kuô̆k hô̆i tơhrâ:

“A hlá cơ khêi hơlŏng trĭng dêi Tơnêi têa, a ngiâ Kuô̆k hô̆i ƀă kuăn pơlê tung lâp tơnêi têa, á – Kăn xiâm hnê ngăn Kuô̆k hô̆i tơnêi têa Kŏng hòa xah hô̆i chuh ngiah Việt Nam pâ tơhrâ: Khŏm mơ-eăm tơdrăng ƀă Tơnêi têa, ƀă Kuăn pơlê, ƀă Luât tơnêi têa Kŏng hòa xah hô̆i chuh ngiah Việt Nam; mơ-eăm pêi klêi tro mâu hnoăng cheăng ki Đảng, Tơnêi têa ƀă Kuăn pơlê pơcháu”.

Tơpui klêi kơ’nâi leh to pro kăn, pôa Trần Thanh Mẫn, Kăn xiâm hnê ngăn Kuô̆k hô̆i tối hiâm mơno nhuô̆m ƀă mơnê khât troh pôa Hồ Chí Minh, Kăn xiâm hnê ngăn tơnêi têa hneăng apoăng; mơnê mâu kăn pơkuâ hneăng hdrối, kăn pơkuâ kăch măng, Nôu Việt Nam khên tơnôu, Khu lêng kring vế tơniăn ki hiăng hlâ, Khu ngế pêi cheăng; mâu rơpŏng mố đô̆i ki hiăng hlâ, mâu mố đô̆i tro rong, mâu mố đô̆i ki châi tamo, rơpŏng ki ai hnoăng ƀă tơnêi têa; mơnê ‘na tơdroăng pơkuâ, hnê mơhno tơtro, rơkê dêi Khu pơkuâ ngăn Tơnêi têa, Khu xiâm pơkuâ tơdroăng kal kí, Khu pơkuâ ngăn Đảng, dêi pôa Nguyễn Phú Trọng, kăn xiâm pơkuâ hnê ngăn Đảng.

Pơkâ ‘na tơdroăng pôk pôa Tô Lâm pro kăn xiâm hnê ngăn tơnêi têa Kŏng hòa xah hô̆i chuh ngiah Việt Nam châ mâu kăn Kuô̆k hô̆i têk kŏng tơbleăng 472/473 ngế kăn veăng têk kŏng môi tuăn. Tơpui a rôh to pro kăn klê leh tơhrâ, pôa Tô Lâm, kăn xiâm hnê ngăn tơnêi têa tơhrâ kô pêi pro kơtăng, tŭm hnoăng cheăng, hnoăng pơkuâ dêi kăn xiâm hnê ngăn tơnêi têa hiăng châ pơkâ thế, pêi pro kơtăng mâu hnoăng cheăng tơpui kâ tung tơnêi têa, tơpui kâ ƀă kong têa ê, tơdroăng cheăng lêng, gâk kring dêi tơnêi têa.

“Hlê rơkê ‘na hnoăng cheăng pôu râng kân kĭn a ngiâ Đảng, Tơnêi têa, Kuăn pơlê, Á tơhrâ kô pêi pro kơtăng, tŭm mâu hnoăng cheăng, hnoăng pơkuâ dêi kăn xiâm hnê ngăn tơnêi têa hiăng châ Luât pơkâ; kơhnâ pêi pro hnoăng cheăng tơpui kâ tung tơnêi têa, tơpui kâ ƀă kong têa ê, tơdroăng cheăng lêng gâk kring dêi tơnêi têa; rơtế ƀă tâi tâng Đảng, tâi tâng kuăn pơlê, tâi tâng khu lêng ƀă mâu khu tơrŭm tung khu pơkuâ tơdroăng kal kí mơdêk hiâm mơno “mơ-eăm xêh, lo ngah, khên tơnôu, hâk tơngăm hdroâng mơngế”; mơ-eăm pêi pro ƀlêi châng mâu troăng hơlâ pơkâ dêi Đảng, ki hdrối tâ cho Pơkâ Hneăng hôp khu kăn lâp tơnêi têa rôh má 13 dêi Đảng”.

Klêi kơ’nâi têk kŏng pôk Kăn xiâm hnê ngăn tơnêi têa, Kăn xiâm hnê ngăn Kuô̆k hô̆i ƀă mâu kơxô̆ phĭu pôk hên ăm hlo tơdroăng ki pôk dêi mâu kăn Kuô̆k hô̆i, xuân môi tiah hnê pơtroh tơdroăng rơhêng vâ dêi kuăn pơlê. Pôa Tô Lâm, kăn xiâm hnê ngăn tơnêi têa ki nếo prế pôa Trần Thanh Mẫn, Kăn xiâm hnê ngăn Kuô̆k hô̆i rak tơniăn tŭm mâu tơdroăng pơkâ tơdjuôm dêi ngế cheăng tung khu xiâm kal kí, Khu pơkuâ ngăn Đảng, ngế ki châ vâi loi nhuô̆m khât tung tâi tâng Đảng ƀă kuăn pơlê. Kăn Phạm Văn Hòa, ngế ki lo ing Đồng Tháp tơngah:

“Péa ƀai pơchuât dêi kăn xiâm hnê ngăn tơnêi têa, Kăn xiâm hnê ngăn Kuô̆k hô̆i, mâu ƀai tơpui kố athế tối nhên tơná á ƀă kuăn pơlê loi tơngah khât a kăn xiâm hnê ngăn tơnêi têa, kăn xiâm hnê ngăn Kuô̆k hô̆i khŏm mơ-eăm tơkâ luâ tơdroăng ki pá puât, tơkâ luâ mâu tơdeoăng vâ pêi klêi tro hnoăng cheăng dêi Đảng ƀă Tơnêi têa ƀă kuăn pơlê pơcháu”.

 Tung pơla cheăng kâ tung tơnêi têa ƀă kong têa ê trâm hên xơpá, tơdroăng séa ngăn tŭm têk mâu inâi kăn pơkuâ xiâm kô kum ‘mâi mơnhông tơ’nôm tơdroăng tơngah, pro ivá vâ tâi tâng khu pơkuâ tơdroăng kal kí tơkŭm pêi klêi hnoăng cheăng ki ối hên xơpá ‘na ngiâ. Kăn Tạ Văn Hạ, ngế ki lo ing Quảng Nam mơnhên tối, pôa Tô Lâm, kăn xiâm hnê ngăn tơnêi têa prế pôa Trần Thanh Mẫn pơrá cho mâu ngế ki châ hnê hriâm rơkê tro, tơdroăng cheăng rơkê hiăng pêi tung hên tíu cheăng ki kal, ai ivá, rơkê tung pêi cheăng.

“Hneăng hôp rôh kố mê ai môi tơdroăng ki kal má môi ƀă xuân châ kuăn pơlê kal vâ ‘nâi plĕng khât, malối cho hnoăng cheăng mâu ngế cheăng. Kuô̆k hô̆i pôk Kăn xiâm hnê ngăn tơnêi têa, Kăn xiâm hnê ngăn Kuô̆k hô̆i  ing mâu rôh pôk vâ mơhno hiâm mơno pôu râng dêi hnoăng cheăng dêi mâu kăn Kuô̆k hô̆i ôh ti xê cho ƀă mâu kăn pơkuâ mê châ pôk hâi kố mê ối cho hnoăng cheăng pro tiah lâi tro ƀă hiâm mơno Đảng, hiâm mơno kuăn pơlê tung tơdroăng pơkuâ tơnêi têa”.