Hơnăm 2012, rơpŏng pôa Ksor Dría, a thôn Plei Tal, cheăm Ia Sol, tơring Phú Thiện ối tung rơpŏng kơtiê, châ xúa ing troăng hơlâ tŏng kum dêi Tơnêi têa. Cho môi ngế đảng viên, pôa hlo ôh ti ro drêng đi đo tơkôm xo tơdroăng tŏng kum dêi tơnêi têa, ing mê, khŏm mơ-eăm hơ’lêh túa tơmiât, túa pêi. Mê rôh tơ’lêi hiăng troh ƀă pôa drêng tơring tơbleăng pơkâ dêi Khu pơkuâ hnê ngăn Đảng ‘na mơdêk rơdêi xúa khoa hok kong ngê̆ tung pêi pêt kế tơmeăm vâ mơjiâng inâi “Phái Phú Thiện”.

Hên rôh hôp châ tơbleăng, mâu tơdroăng ki tôu tuăn, ‘na túa ki pêi, hôm tơƀrê, hôm pơxúa châ tơpui tối leăng, nhên. Đảng viên, ngế pơkuâ thôn, krâ pơlê, ngế ki châ kuăn pơlê loi nhuô̆m prôk hdrối vâ kuăn pơlê tiô ƀối kơ’nâi. Pôa Ksor Dría mung liăn, xúa kih thuât pêt báu 2 rơnó a tơnêi pêi chiâk rơdâ 1 ha dêi rơpŏng. Klêi kơ’nâi hên hơnăm hmâ pêi klâng pêt báu, tơdroăng rêh ối dêi rơpŏng hiăng hơ’lêh.

“Vâ hluăn ing kơklêa kơtiê, hơ’lêh tơdroăng cheăng kâ dêi rơpŏng, mơ-eăm tung rêh ối mê rêm rơpŏng kal athế môi hiâm mơno tŏng kum dêi rơpó pôi tá tơkôm a tơdroăng ki tơnêi têa tŏng mê athế mơ-eăm xêh, mơ-eăm pêi cheăng tiah mê pin nếo ai kế kâ tơmeăm ‘măn, mơjiâng bro hngêi lĕm. La xuân mơnê Tơnêi têa hiăng tơmâng ngăn tŏng kum vâ vâi krâ nhŏng o hơ’lêh túa tơmiât túa pêi, vâ tơdroăng pêi chiâk deăng pro pơxúa tơƀrê tâ, ing mê kum vâi krâ nhŏng o mơ-eăm mơnhông cheăng kâ”.

Vâ châ 70 hơnăm hmâ ƀă pơlê cheăm, báu chối a chiâk, pôm loăng hiăng kum rơpŏng pôa A Nghiêm cheăm Ia Yeng, tơring Phú Thiện, Gia Lai ai hmê kâ, ai ếo xâp. La lối chât hơnăm kố, chiâk deăng ki ton nah hiăng chiâng mâu tơbăng klâng pêt báu 2 rơnó kơpâu lĕm, cheăng kâ rơpŏng hngêi hiăng hơ’lêh, pôa A Nghiêm hiăng rế hía rế hmâ ƀă tơdroăng ki liăn ngân ki pêi lo ƀă ki pơxúa tơkâ:

“Hdrối nah, pêt báu ôh tá kơpâu lĕm xua kuăn pơlê pêt iâ êt ukố utá, tá hâi ‘nâi xúa khoa hok kih thuât ƀă rah xo hdrê, ƀă pơtối mê nếo cho tíu tê ôh tá tơniăn. La nôkố mâu tơdroăng ki mê hiăng tơ’lêi hlâu tâ, châ pêt a môi ƀăng klâng rơdâ, xúa khoa hok kih thuât, ƀă ai hên hdrê báu ki nếo mê báu kơpâu lĕm khât”.

Drêng hlo nhên ki tơƀrê, báu tum kơpâu lĕm a ƀăng klâng, vâi krâ nhŏng o pơxiâm loi ƀă rơtế dêi rơpó pêt báu, ing mê mâu ƀăng klâng kân rơdâ chiâng rế ai hên. Mâu rơpŏng dêi thôn, cheăm hiăng pro ‘noăng, tơkŭm klâng, xúa ki rơkê plĕng dêi khoa hok kih thuât tung mơdâ pêt báu. Ôh tá ai xếo tơdroăng klâng ngế ki lâi ngế ki mê pêi.

Kơnôm mê, ki kơpâu lĕm dêi báu rế hía rế lĕm, hên rơpŏng châ ing 7,5 troh 8 tâ̆n môi ha. Pôa Rmah Dmeo, pơlê Rbai, cheăm Ia Piar, tơring Phú Thiện, ăm ‘nâi:

“Nôkố pêi hiăng phá tơ-ê ƀă nah, tơdroăng ki pêi chiâk klâng pơrá xúa kơmăi kơmok tâi, ƀă mâu rơchoâ têa bê tŭm têa vâ ‘no ăm mâu ƀăng klâng, môi tiah nah pêi ƀă chêng kŏng gá tơbrêi khât, nôkố pêi ƀă kơmăi kơmok tâi tâng mê tơdroăng cheăng xuân tơ’lêi hlâu tâ, bu kal kơhnâ pêi cheăng xo, pơtối mê nếo nôkố ai hên hdrê báu ki nếo lĕm kơpâu, xua mê pin bu pêi tiô rơnó xúa hdrê báu phá ra phá dêi rơpó, hdrối nah mê pêi môi rơnó, nôkố hơ’lêh chiâng pêi péa rơnó”.

Pêi pro Pơkâ kơxô̆ 05/2012 dêi Khu pơkuâ ngăn Đảng Phú Thiện ‘na mơdêk xúa khoa hok – kong ngê̆ tung pêi chiâk klâng, vâ pêi troh tơdroăng mơjiâng inâi “Phái Phú Thiện”, rêm hơnăm tơring kơjo kum liăn ăm kuăn pơlê pêi chiâk, malối cho kuăn pơlê hdroâng kuăn ngo po rơdâ ƀăng tơnêi pêt báu pêt môi hdrê, ƀă inâi báu hdrê tơniăn kơpâu lĕm, dâi.

Klêi kơ’nâi lối 10 hơnăm tơbleăng Pơkâ kơxô̆ 05 dêi Khu pơkuâ ngăn Đảng, Phú Thiện hiăng mơjiâng châ 18 ƀăng klâng kân rơdâ pêt môi hdrê báu, ƀă ƀăng klâng vâ chê 700 ha. Hơnăm 2019, inâi phái Phú Thiện hiăng châ Khu rak ngăn Tuăn ngoâ rơkê (Khu xiâm ngăn Khoa hok ƀă Kong ngê̆) hbru ăm ƀâng mơnhên. Ing kố, inâi phái Phú Thiện hiăng păng ‘nâng châ rak vế tung lâp tơnêi têa.

Tiô pôa Vũ Hồng Duy, Kăn phŏ pơkuâ ngăn Đảng tơring Phú Thiện, tơdroăng ki kal tung inâi kố, ôh ti xê báu kơpâu lĕm, ki kơnâ ‘na liăn ngân, mê cho tơrŭm cheăng rơtế ai pơxúa tung tơdroăng ki kơnía dêi báu phái:

“Tơdjêp, tơrŭm ƀă mâu khu mơdró kâ, tơrŭm ƀă Grup pơkuâ Lộc Trời tung mơjiâng inâi phái Phú Thiện, xuân môi tiah mơjiâng bro mâu hdrê báu ki lĕm a tơring. Ing mê xuân roê xo tâi tâng báu phái ki dâi lĕm ăm vâi krâ nhŏng o a tơring ing mê veăng kum rak vế ki rơdêi ‘na mơnhông cheăng kâ rêh ối pơlê pơla dêi tơring”.

Mơnhông inâi báu phái a tơring Phú Thiện, kong pơlê Gia Lai xuân ối tung môi khế hơnăm ki ton xŏn. Pơtối ƀă mâu hdrê báu ki kơpâu lĕm, dâi châ mơdâ pêt. Mâu ƀăng klâng kân, mơdâ pêt tiô chal nếo nôkố, dế pơtối châ pơtối châ po rơdâ, ki kơnía ‘na tê mơdró dêi phái pơtối mơdêk ƀă hên ki ê ing mê, pêi châ liăn ăm vâi krâ nhŏng o a mâu thôn pơlê.