Péa kăn pơkuâ rơtế mơhnhôk hiêm mơno mâu mô đô̆i dêi Việt Nam, kum thăm tơrŭm ƀă pêi trâu hơhngế tâ mê nếo tơrŭm cheăng lĕm tro pơla Việt Nam ƀă Australia, ki rơhêng vâ tối cho tung kơvâ rak hơniêp lĕm Khu lâp kong têa. Sap ing roh apoăng veăng tơdroăng rak hơniêp lĕm dêi Khu lâp kong têa a hơnăm 2014, troh nôkố, Kơ koan rak hơniêp lĕm Việt Nam hiăng tơbleăng ăm Đảng, Tơnêi têa, Khu pơkuâ cheăng Đảng kơvâ mô đô̆i Tơnêi têa, Khu xiâm pơkuâ mô đô̆i pêi pro 533 roh kăn ƀô̆, sih quan Khu mô đô̆i ƀă 4 sih quan kan sár ối tung Khu xiâm pơkuâ Kŏng an veăng tơdroăng rak hơniêp lĕm a Tíu pêi cheăng Khu lâp kong têa ƀă mâu khu xiâm.

Australia cho môi tung mâu kong têa apoăng kĭ tơkêa Mơ-éa chô vế troh Việt Nam ‘na tơrŭm cheăng tung kơvâ Rak hơniêp lĕm Khu lâp kong têa a hơnăm 2015, pro xiâm kối vâ pêi pro mâu tơdroăng xiâm tơrŭm păng ‘nâng ƀă châ tơƀrê. Phiu ro drêng troh lăm pôu Kơ koan xiâm rak hơniêp lĕm Việt Nam, pôa David Hurley mơnhên Australia đi đo hâk phiu tơrŭm cheăng ƀă Việt Nam tung hnoăng cheăng rak hơniêp lĕm dêi Khu lâp kong têa.