Hên tơnêi ối, tơnêi tê mơdró châ mơnhên hdrối nah a pơlê kong kơdrâm Ƀuôn Ma Thuột, kong pơlê Dak Lak chiâng tơnêi kong, tơnêi loăng drêh hiăng tơdjâk troh tơdroăng mơjiâng pro hngêi trăng, hngêi kơmăi, tíu pêi cheăng mơjiâng tơmeăm dêi hen khu mơdró.

A rôh hôp tơpui tơno pơla mâu kăn Vi ƀan kuăn pơlê dêi pơlê kong kơdrâm ƀă mâu khu mơdró châ tơkŭm po hâi lơ 27/11, hên khu mơdró hiăng tối tơdroăng mê ƀă púi vâ Vi ƀan pơlê kong kơdrâm Ƀuôn Ma Thuột ai pơkâ tah, rĕng ngăn nếo mâu kơpong pêi cheăng, hngêi kơmăi pêi pro tơmeăm, uâ pơliê pro ki kố ki mê vâ khu mơdró ai pơkâ ‘no liăn cheăng ăm tơtro.  

Mâu khu mơdró tối tiah kố ki pơ’lêh tung tơdroăng pơkâ xúa tơnêi tung lơgât kơchuâ hdró nếo ai hên tơdroăng ki ôh tá tro tâng vâ pơchông ƀă pơkâ ton nah. Tiâ ‘na tơdroăng mê, pôa Vũ Văn Hưng, Kăn xiâm hnê ngăn Vi ƀan pơlê kong kơdrâm Ƀuôn Ma Thuột, kong pơlê Dak Lak tối ai ki ôh tá tro xua ôh tá hlê tung tơdroăng pơkâ dêi mâu khu ki xing xoăng dêi mâu kăn ƀô̆ pêi tơdroăng pơkâ hdró hâi tro. Hên tíu pêi cheăng hnê tối hâi prôk tâi mâu kơpong chiâng ai tơdroăng pơkâ hdró ôh tá tro.

‘Na troăng hơlâ vâ tơkâ luâ tơdroăng mê, pôa Vũ Văn Hưng ăm ‘nâi: pơlê kong kân dế pêi tơdroăng pơkâ tơdjuôm pơlê kong kơdrâm, drêng hiăng prê klêi pơkâ hdró tơdjuôm mê kô ‘mâi hơ’lêh nếo, vêh tơnêi tro tiô pơkâ dêi mơngế kuăn pơlê hdrối nah.