Vi ƀan kuăn pơlê kong pơlê Gia Lai pơkâ hlá mơ-éa vâ pêi pro tiô tơdroăng hnê mơhno dêi Chin phuh ‘na xut tah hngêi pơtân, hngêi xi kơchoh, vâ tơniăn ăm kuăn pơlê ai tíu ối tơniăn. Kong pơlê pơkâ xut tah lối 3.000 toăng hngêi pơtân, hngêi hi kơchoh dêi mâu ngế ai hnoăng ƀă kăch măng, rơpŏng kơtiê, vâ chê kơtiê.

Ki xiâm tơdroăng kố thế pêi klêi hdrối khế 9 hơnăm 2025. Tiô Khu xiâm ngăn cheăng pêi, Mố đô̆i tro rong ƀă rêh ối pơlê pơla Gia Lai, sap hơnăm 2021 troh nôkố, kong pơlê hiăng kơjo kum pro nếo ƀă ‘mâi rơnêu pro 4.365 toăng hngêi ƀă tâi tâng kơxô̆ liăn lối 234 rơtal liăn. Laga, klêi  tăng ngăn nếo achê kố ăm hlo kong pơlê ối luâ 3.000 rơpŏng  kơtiê, vâ chê kơtiê ƀă mâu ngế ai hnoăng ƀă  tơnêi têa kal châ kơjo kum pro hngêi nếo lơ ‘mâi rơnêu hngêi.

Vâ mơdêk rĕng pro, Vi ƀan kong pơlê hiăng pơcháu ăm khu xiâm ngăn cheăng pêi - Mố đô̆i tro rong ƀă rêh ối pơlê pơla pơkuâ tơrŭm ƀă mâu tíu pêi cheăng, kơvâ cheăng ki tơdjâk troh mơjiâng pơkâ nhên, tơniăn tăng ngăn nhên pro tro mơngế ví ki lơ hiăng chêh ah chêh nếo pơla mâu tơdroăng.

Pakĭng mê, Khu ngăn ‘na mơjiâng hngêi trăng kô ai hnoăng vê hdró ki iâ 3 túa hngêi ăm tơtro ƀă túa tơlá dêi kong pơlê, ai tiô pơkâ tro kih thuât ƀă hlối tơniăn ƀă kơxô̆ liăn tơtro vâ kuăn pơlê tơ’lêi rah xo.