Tơdjâ tơdroăng ka dêi rôh hôp, Kăn xiâm phŏ hnê ngăn Kuô̆k hô̆i Nguyễn Thị Thanh tối nhên Vi ƀan pơkuâ Kuô̆k hô̆i tối hiâm mơno mơnê ó khât ƀă pơtroh rơkong rơkâu lĕm tro má môi kơ mâu thái cô hdrối nah, rơtế ƀă vâ chê 1,6 rơtuh ngế thái cô, kăn ƀô̆ pơkuâ ngăn hnê hriâm tung lâp kơpong dêi Tơnêi têa. Tơdrêng amê hlối pơkâ thế kăn Kuô̆k hô̆i tơmâng ngăn tơpui tơno ‘na mâu tơdroăng pơkâ mơ’no tung Luât Thái cô.

Tối troh túa pơkâ dei luât ‘na tơdroăng ki rah xo thái cô, Trần Văn Thức, ngế ki lo ing Thanh Hóa ăm ‘nâi nôkố tơdroăng ki rah xo thái cô tung mâu tíu cheăng kong lâ̆p dế pêi pro tiô pơkâ tơdjuôm ‘na tơdroăng ki rah xo viên chưk, kố cho tơdroăng ôh tá tơniăn pro chiâng ai tơdroăng ki rơlối thái cô hên, cho xiâm kối pro hên kong pơlê ôh tá chiâng vâ xo mâu thái cô hnê, ôh tá chiâng tơkŭm hnê hriâm ai mâu môn hriâm vâ tơbleăng tơdroăng hnê hriâm phôh thong hơnăm 2018.

“Á môi tuăn khât ƀă tơdroăng ki môi tuăn khât ƀă tơdroăng kơxop hlá mơéa luât pơcháu hnoăng hbrâ rơnáu ăm kơvâ hnê hriâm tung tơdroăng rah xo, xúa mâu thái cô hnê. Tiah mê, Khu xiâm ngăn hnê hriâm ƀă hnê mơjiâng tuăn ngoâ rơkê, Khu xiâm ngăn pêi cheăng Mố đô̆i tro rong ƀă rêh ối pơlê pơla cho kơ koan pơkuâ mơjiâng tơdroăng cheăng tung la ngiâ, tơdroăng pơkâ, túa pơkâ pơtroh ăm râ ki ai hnoăng pơkuâ pơkâ, xing xoăng ƀiên chê̆ thái cô tung mâu tíu ki hnê hriâm kong lâ̆p châ kơ koan ai hnoăng pơkuâ pơcháu, mâu kơ koan pơkuâ ngăn hnê hriâm lơ tíu ki hnê hriâm pơkuâ tung rah xo thái cô. Kố cho túa pơkâ ki kalo chiâng vâ tŏng gum tơdrêng mâu tơdroăng ki pá puât, malối cho rế hía rế ó ‘na tơdroăng ki rơlối thái cô, ối kal thái cô ing hên hơnăm kố a hên kong pơlê”.

Veăng gum ‘na mâu tơdroăng pơkâ rak vế thái cô, Nguyễn Văn Cảnh, ngế ki lo ing Bình Định tối tơdroăng ki xuân ối a mâu nôu pâ hok tro ‘nhiê pâm thái cô, hok tro tơpui ‘mêi mâu thái cô pro tơdjâk troh um méa thái cô, tơdjâk troh khôi hmâ tơdroăng ki loi nhuô̆m thái cô. Ngế ki mê pơkâ thế:

“Á pơkâ thế Troăng 11 kal ‘mot tơ’nôm pơkâ mâu tơdroăng ki nôu pâ mơngế hok tro ôh tá pro ƀă thái cô drêng thái cô pêi luâ tơdroăng pơkâ ăm phêp, nôu pâ ngế hok tro xuân pôi tá chiâng tơleăng mâu tơdroăng ki tơhôu ƀă mâu thái cô, mê athế tơbleăng ing hngêi trung khu teăng mâ nôu pâ, kơ koan tơnêi têa. Troăng 9 pơkâ ‘na hnoăng cheăng dêi thái cô, á pơkâ thế ‘mâi rơnêu chiâng hnoăng cheăng ƀă hnoăng cheăng pôu râng dêi thái cô. Ƀă mâu tơdroăng ki pôu râng dêi mâu thái cô mê kal ‘mot tơ’nôm tơdroăng ki ai tơdroăng tơrŭm dêi nôu pâ ƀă ngế ki hriâm. Pơtih, drêng hlo ivá ngế hriâm tơná thái cô ôh tá kaia mơnhông ivá dêi ngế hriâm mê kal tơpui tơno ƀă nôu pâ hok tro”.

‘Na troăng liăn khế ƀă liăn gum ki ê ăm thái cô, Dương Khắc Mai, Ngế ki lo ing Dak Nông tối môi tuăn khât ƀă kơxop hlá mơéa pơkâ liăn khế dêi thái cô ối a ‘ngêi má môi tung mâu tthang ƀâc liăn khế dêi mâu kơvâ cheăng, vâ tŏng gum xơpá ƀă tơdroăng ki xiâm dêi tơdroăng cheăng dêi thái cô. Ngế ki mê pơkâ thế tơdroăng ki klâ thang ƀâc liăn khế athế tro ƀă tơdroăng liăn khế dêi mâu thái cô.

“Pakĭng mê xuân ối ai mâu thái cô tá mâu kăn ƀô̆ râ pơkuâ pro xôi ‘na tơdroăng cheăng chiâng ai tơdroăng ki khéa hơ’nêng troh tơdroăng ki pơkâ thế pơxâu phâk. Maluâ tiah mê á tối tơdroăng kố cho xuâ hâi kố pin dế pêi tiô luât rế prôk ƀă tơdroăng ki pêi pro troăng hơlâ tŏng gum liăn khế mê tung pơla pêi pro tiô luât kal athế ai mâu pơkâ vâ mơdêk liăn khế ăm khu thái cô rế hía rế mơjiâng khu thái cô rơkê khât ‘na tơdroăng cheăng pêi pro châ tơdroăng tơxâng tŭm têk mâu túa pơkâ ‘na túa rêh ối dêi Thái cô kơhnâ pôu râng dêi hnoăng cheăng”.

Tơpui tơmâng xo mâu rơkong tơpui tối dêi mâu kăn Kuô̆k hô̆i, pôa Nguyễn Kim Sơn, Ngế xiâm ngăn hnê hriâm ƀă hnê mơjiâng tuăn ngoâ rơkê tối mơnê mâu rơkong tơpui dêi mâu kăn Kuô̆k hô̆i tơpui ‘na kơxop hlá mơéa Luât Thái cô. Ngế xiâm ngăn hnê hriâm ƀă hnê mơjiâng tuăn ngoâ rơkê tối tiah kố, ƀă mâu túa tơmiât môi tuăn khât, môi tuăn hên hiăng châ tơpui tơno, mơni kô châ hlo tơdroăng ki rơtế prôk dêi mâu kăn; mê ôh ti xê cho tơdroăng ki môi tuă ƀă kơxop hlá mơéa Luât Thái cô, mê ối cho tơdroăng ki mơhno hnoăng cheăng ƀă kơvâ ngăn hnê hriâm ƀă tơnêi têa.