Ƀă vâ chê 30 tơdroăng cheăng, hneăng lăm pôu kong têa Kul dêi Kăn xiâm hnê ngăn Kuô̆k hô̆i hiăng pêi cheăng tơƀrê. Tung hneăng lăm pôu kong têa Kul, pôa Trần Thanh Mẫn, Kăn xiâm hnê ngăn Kuô̆k hô̆i  tơpui tơno ƀă pôa Norodom Sihamoni, Kăn xiâm hnê ngăn Kuô̆k hô̆i; tơpui tơno ƀă pôa Hun Sen - Kăn xiâm hnê ngăn Đảng, Kăn hnê ngăn Kuô̆k hô̆i râ má môi; tơpui tơno ƀă pôa Hun Manet - Ngế pro xiâm hnê ngăn tơnêi têa; tơpui ƀă pôa Samdech Khuon Sudary - Kăn xiâm hnê ngăn Kuô̆k hô̆i Kul...

A rôh tơpui ƀă Kăn xiâm hnê ngăn Kuô̆k hô̆i Kul, péa ngế kăn rơtế  vâ môi tuăn tiah kố, péa ngế Kăn Kuô̆k hô̆i kal pơtối rak hnoăng cheăng pêi dêi kơ koan mơjiâng luât péa tơnêi têa tung mơdêk tơrŭm cheăng kâ pơla péa pâ;  séa ngăn, mơdêk mâu khu xiâm , kơvâ cheăng, kong pơlê, mâu khu mơdró kơhnâ tơbleăng pêi ai pơxúa mâu tơdroăng tơhrâ, kĭ tơhrâ, Tơhrâ ki hiăng kĭ; mơdêk tơpui tơno, tối mâu túa pêi cheăng  tơkŭm pêi dêi Kuô̆k hô̆i vâ châ tơƀrê, malối tung mơjiâng luât pơkâ, tơdroăng cheăng ‘na luât ƀă séa ngăn tơbleăng pêi ‘na luât, veăng ‘no hnoăng pơkâ tơdroăng ki kal dêi tơrêm tơnêi têa.