Mơnhên tối hlá mơ-éa pơchuât tơbleăng klêi ‘nâi tơdroăng cheăng mơjiâng Đảng, khu pơkuâ tơdroăng kal kí, mơnhông cheăng kâ rêh ối pơlê pơla, tơdroăng cheăng lêng gâk kring, tơpui kâ dêi pơlê kong kân, Pôa Tô Lâm, Kăn xiâm pơkuâ hnê ngăn Đảng ăm ‘nâi Tơnêi têa mơnhên Hà Nội cho Đảng ƀô̆ ki kal, đảng ƀô̆ ki djâ troăng ahdrối, púi vâ pơlê kong kân kơhnâ tơbleăng mâu tơdroăng pơkâ dêi Đảng vâ rĕng châ xúa tung tơdroăng rêh ối, troh ƀă khu râ, rêm ngế kăn ƀô̆, đảng viên.

Pakĭng mê, púi vâ Hà Nội chiâng pơlê kong kân thăm mơnhông cheăng kâ dêi kơpong ƀă tá lâp tơnêi têa, pơkuâ djâ thăm mơnhông ăm mâu kong pơlê tâ tá, Kăn xiâm pơkuâ hnê ngăn Đảng xuân pơkâ thế Hà Nội athế chiâng tíu xiâm dêi pơhlêh nếo rơkê. ‘Na hnoăng cheăng ki hdrối, pôa Tô Lâm, Kăn xiâm pơkuâ hnê ngăn Đảng pơkâ thế Hà Nội kal tơkŭm pêi pro tro tơdroăng pơkâ 35 dêi Khu xiâm pơkuâ tơdroăng kal kí ‘na hneăng hôp Đảng ƀô̆ rêm râ vâ pêi pro troh Hneăng hôp khu kăn lâp tơnêi têa rôh 14 dêi Đảng tro tiô pơkâ.