Tiô Khu xiâm ngăn ‘na chiâk deăng ƀă mơnhông thôn pơlê Dak Lak tối, hơnăm kố pơreăng châi klêa chu châu Phi a kong pơlê tâ tú rơ-iô. Troh tơdế khế 11, pơreăng hiăng hlo tâ tú a 233 rơpŏng, 120 thôn, 43 to cheăm ƀă 10 tơring, pro hlâ ƀă prâu tah lối 2.700 to chu, tung kơxô̆ tâi tâng vâ chê 140 tâ̆n.

Vâ kâi mơdât pơreăng, Kăn hnê ngăn Vi ƀan kuăn pơlê kong pơlê Dak Lak nếo pơtroh hlá mơ-éa thế Vi ƀan kuăn pơlê mâu tơring, pơlê krâm, pơlê kong krâm, ƀă mâu kơvâ cheăng tơbleăng pêi kơtăng, tơdrêng mâu troăng rơhlâ hbrâ mơdât pơreăng châi klêa chu Châu Phi. Malối, a Khu xiâm ngăn ‘na chiâk deăng ƀă mơnhông thôn pơlê, séa ngăn ‘na pơreăng, hbrâ hnê mơhno, tơbleăng tối troăng rơhlâ pêi pro vâ tơniăn hơ’nêh mâm tê hdrối, tung ƀă klêi kơ’nâi Têt Lo hơnăm nếo  Ất Tỵ  2025.