Troh nôkố kong pơlê Kon Tum hiăng pêt mơjiâng châ vâ chê 11.300 hectar loăng pơkeăng, tung mê, krê ƀăng loăng pơkeăng kong sâm Ngọc Linh lối 2.400 hectar. Pêi lo liăn ing loăng pơkeăng hiăng kum rơpâu rơpŏng kuăn pơlê hdroâng kuăn ngo a mâu tơring: Tu Mrông, Kon Plông ƀă Đăk Glei mơ-eăm hluăn ing kơtiê, kum mơdêk cheăng kâ – rêh ối pơlê pơla kơpong hơngế hơngo dêi kong pơlê.

Nôkố, kong pơlê Kon Tum dế hriăn plĕng, mơjiâng mâu troăng hơlâ ki phá tơ-ê tŏng gum kuăn pơlê ‘na hdrê, kih thuât, uâ mơdiê...vâ po rơdâ ƀăng deăng rế mơdêk ki kơnâ tơmeăm pơkeăng. Vâ mơdêk pêt mơjiâng pơkeăng thế po rơdâ tíu pro hdrê. Tơdrêng amê, yă hdrê pơkeăng kong sâm ki kơnâ Ngọc Linh; 1 pơ’leăng hdrê ai yă dâng 100.000 liăn, 1 xiâm hdrê loăng 1 hơnăm 300.000 liăn. Xua mê, Kon Tum kal khât tung mơhnhôk khu mơ’no liăn cheăng ‘na kơvâ pêi pêt, rak ngăn hdrê loăng kố, ing mê, nếo châ mơjiâng kơpong pêt pơkeăng hên, kân rơdâ.