Péa pâ hiăng tơpui tơno tung tŭm tơdroăng mâu troăng hơlâ ki kân, ‘nâi nhên mâu tơdroăng vâ pêi vâ mơdêk  tơrŭm cheăng  tung la ngiâ. Péa pâ hiăng vâ môi tuăn kal pơtối rak vế tơpui tơto tâi tâng rêm râ, mơdêk rơdêi tơrŭm tung mâu kơvâ cheăng kâ, hnê hriâm- hnê mơjiâng tuăn ngôa rơkê, khoa hok - kơmăi kơmok, pêi cheăng, túa lĕm tro - pơtâp ivá - Ôm hyô ƀă trâm tơpui tơno ƀă kuăn pơlê. 

Pôa Lương Cường Kăn xiâm hnê ngăn tơnêi têa ăm ‘nâi: Péa pâ hiăng ‘nâi nhên pơkâ mơdêk tơƀrê tơrŭm ‘no liăn cheăng ƀă kơxô̆ tơmeăm tê mơdró péa pâ; pêi tŭm mâu tơdroăng  tơhrâ ki dêi péa tơnêi têa hiăng kĭ lơ veăng pêi, malối xúa tŭm tơdroăng pêi pro drêh rôh ki tơ’lêi  hlâu ing Tơdroăng kĭ tơhrâ Tê mơdró tơniăn xua Việt Nam – EU(EVFTA); pơtối rak luât pơkâ tơrŭm cheăng, tung mê ai Vi ƀan tơrŭm tung Chin phuh ‘na tơrŭm cheăng kâ ƀă khoa học - kỹ thuật. Pakĭng mê, péa pâ vâ môi tuăn po troăng  tơrŭm cheăng ki nếo ki Bulgaria ai rơdêi ƀă Việt Nam kal vâ pơ’lêh kơxô̆, kŏng ngê̆ sinh hok tung pêi chiâk ƀă khăm pơlât.