Tung hngêi nếo pro krá lĕm, nâ Hiao, pơlê Bông Phul, cheăm Chư Á, pơlê kong kdrâm Pleiku ôh tá kơtôa rơrêk tung hiâm mơno. Nâ tối, hdrối nah, rơpŏng hngêi thế rêh ối tung hngêi pơtân, rơnó mêi khía ôh tá hmiân tuăn. Kơnôm ai mâu kăn ƀă kơxô̆ liăn ing tơdroăng xăm kơtiê krá tơniăn ăm mung, nâ hiăng ai hngêi ối nếo tơniăn tung rêh ối ƀă mơ-eăm pêi cheăng mơ nhông rơpŏng hngêi hluăn kơtiê.

"Hngêi á kơtiê lêi. Hngêi ki ton pro hiăng ton nah, kong mêi xi kơchoh, koi kơmăng ôh tá kâi hlâk. Nôkố tơnêi têa kơjo kum pro hngêi nếo, a hiăng hmiân tuăn, ai hngêi nếo’’.

Tơdrêng ƀă rơpŏng hngêi nâ Hiao, sap hơnăm 2021 troh nôkố, Đảng ủy cheăm Chư Á hiăng pơkuâ mâu kăn ƀă măt trâ̆n khu grup mơdoh tăng mâu khu xiâm veăng ing tơdroăng tơkêa bro. Mâu kơxô̆ liăn veăng kơ jo kum xăm kơtiê, liăn ‘’xua mơngế kơtiê’’ hiăng kum mơjiâng pro hngêi ối ăm 22 rơpŏng kuăn pơlê kơtiê ƀă kum 64 to ro kơdrâi kum mâu rơpŏng vâ chê kơtiê păn vâ mơnhông cheăng kâ. Troh nôkố, cheăm Chư Á hiăng ai 16 rơpŏng hluăn kơtiê ƀă 12 rơpŏng vâ hluăn kơtiê, xăm kơxô̆ rơpŏng hluăn kơtiê, xăm kơxô̆ rơpŏng kơtiê dêi cheăm chu ối 39 rơpŏng (châ 1,58%). Pôa Trương Văn Minh, kăn phŏ hnê ngăn Đảng, Kăn hnê ngăn Vi ƀan kuăn pơlê cheăm Chư Á tối:

“Tung la ngiâ, Đảng ƀô̆ ƀă mâu kăn tơkŭm mâu kăn kuăn pơlê pơtối rak tơmeăm khoăng pêi pro tiô pơkâ xăm kơtiê ing hơnăm 2025. Malối, tơdroăng hnê cheăng pêi ăm mơngế pêi cheăng tung thôn, malối kơpong hdroâng kuăn ngo, kum kuăn pơlê ai cheăng pêi tơniăn, hluăn kơtiê krá ton. Mơ-eăm troh hơnăm 2025, cheăm kô ôh pá ai xếo rơpŏng kơtiê’’.

Sap hơnăm 2021 troh nôkố pơlê kong kơdrâm Pleiku hiăng kơjo kum ‘mâi rơnêu pro 64 toăng hngêi ăm rơpŏng kơtiê, ƀă tâi tâng kơxô̆ liăn lối 3 rơtal liăn. Vâ chê 100 rơpŏng kơtiê ƀă vâ chê kơtiê hiăng châ mung liăn tŏng gum mơnhông cheăng kâ, ƀă kơxô̆ liăn lối 4,6 rơtal liăn. Nôkố lâp tung pơlê kong kơdrâm bu ối 149 rơpŏng, tơ’mô 0,24%. Kơxô̆ rơpŏng kuăn ngo xuân kơdroh sap 2,94% hơnăm 2021 chu ối 1,29%.

Pơtối rak ki tơƀrê hiăng pêi châ tơƀrê, Pơlê kong kơdrâm Pleiku kô pơtối hnê mơhno mâu cheăm tơring tơrŭm pêi tơdroăng cheăng, rah xo tơdroăng kơjo kum pêi châ tơƀrê, tơtro ƀă tơrêm ngế. Jâ Nguyễn Thị Thúy Diễm, Kăn phŏ hnê ngăn Đảng ủy, Kăn hnê ngăn Vi ƀan kuăn pơlê cheăm Diễn Phú, pơlê kong kơdrâm Pleiku, ăm ‘nâi:

"Ngin pơtối mơjiâng pơkâ kơjo kum rơpŏng kơtiê pơla hơnăm 2025; mơdêk pê lo liăn kum kuăn pơlê, pơtối rak mâu hnoăng pêi ai pơxúa xut tah kơkêa kơdroh kơtiê tung mâu hơnăm hdrối ƀă pêi tro tâ tung la ngiâ’’.

Pôa Nguyễn Thanh Bình, Kăn xiâm phŏ hnê ngăn Vi ƀan Măt trâ̆n tơnêi têa Việt Nam pơlê kong kơdrâm Pleiku ăm ‘nâi, tung la ngiâ Măt trâ̆n tơnêi têa rơtế ƀă Đảng ƀô̆, mâu kăn pơlê kong kơdrâm tung pêi pro luât pơkâ tŏng kum hdroâng kuăn ngo, mâu kăn pơlê kong kơdrâm Pleiku tung pêi pro  tro luât pơkâ hdroâng kuăn ngo ƀă xăm kơtiê krá ton:

"Tung la ngiâ, Vi ƀan Măt trâ̆n tơnêi têa Việt Nam pơlê kong kơdrâm ƀă mâu khu grup, mâu kơvâ cheăng kô pơtối tơrŭm mơdêk tơdroăng cheăng hnê tối, mơhnhôk kuăn pơlê pêi tro mâu tơdroăng mơhnhôk ƀă tơdroăng tơ’noăng pâ nhoăm tơnêi têa rơtế ƀă mâu tơdroăng pơkâ xăm kơtiê krá tơniăn, mơdêk ki tơƀrê tung tơdroăng rêh ối dêi kuăn pơlê a mâu pơlê hdroâng kuăn ngo”.

Mâu tơdroăng ki tơƀrê tung tơdroăng xăm kơtiê krá tơniăn a Pleiku, kong pơlê Gia Lai ăm hlo hnoăng cheăng pơkuâ tâi tâng tung tŭm tơdroăng, nhên khât dêi khu tơrŭm cheăng Đảng hiăng mơhnhôk gum kuăn pơlê, malối cho kuăn pơlê hdroâng kuăn ngo, mơ-eăm mơnhông hluăn kơtiê, vâ hluăn kơtiê, mơnhông rêh ối tơniăn ƀă xông tơƀrê.