Tơdah rơkong krếo thế dêi pôa Lương Cường, Kăn xiâm hnê ngăn tơnêi têa, pôa Rumen Radev, Kăn xiâm pơkuâ kong têa Bulgaria ƀă kơdrâi pôa hiăng troh pơlê kong xiâm Hà Nội, pơxiâm roh lăm pôu pêi cheăng păng ‘nâng Việt Nam sap ing hâi lơ 24 troh lơ 28/11/2024.

Kơxo lơ 25/11, a Tíu pêi cheăng Kăn xiâm hnê ngăn tơnêi têa, pôa Lương Cường, Kăn xiâm hnê ngăn tơnêi têa ƀă kơdrâi pôa hiăng pơkuâ Leh tơdah păng ‘nâng pôa Rumen Radev, Kăn xiâm pơkuâ kong têa Bulgaria ƀă kơdrâi pôa lăm pôu păng ‘nâng Việt Nam.

Klêi kơ’nâi leh tơdah, pôa Lương Cường, Kăn xiâm hnê ngăn tơnêi têa ƀă pôa Rumen Radev, Kăn xiâm pơkuâ kong têa pơkuâ djâ khu râ kăn péa tơnêi têa tơkŭm hôp tơpui tơno, mơnhên tơdroăng châ tơƀrê tơrŭm cheăng péa tơnêi têa tung pơla kố nah ƀă pơkâ mâu troăng tơrŭm cheăng la ngiâ.

Péa ngế Kăn xiâm pơkuâ hiăng tơpui trâu rơdâ ‘na mơnhên troăng prôk la ngiâ kân, mâu troăng pêi ki nhên vâ thăm tơrŭm cheăng ƀă mơdêk ki kal tơrŭm cheăng tung la ngiâ. Ki má lối cho thăm trâm mâ khu râ kăn xiâm, pro krá tơniăn tơdroăng ki tơrŭm cheăng ‘na tê mơdró, mơ’no liăn cheăng, mơhnhôk mâu Khu xiâm, kơvâ cheăng kong pơlê ƀă khu tê mơdró péa pâ pêi pro châ tơƀrê Pơkâ Tê mơdró tơ’lêi hlâu Việt Nam – EU; mơdêk tơrŭm cheăng tung mâu kơvâ pêi chiâk deăng, khôi túa lĕm ivá, kŏng ngê̆ thông tin, uâ mơdiê tơmeăm khoăng tung kơdâm tơnêi, kong prâi. Péa pâ mơnhên kô tơrŭm krá tơniăn, tối ăm dêi pó túa ki rơkê tơtro ƀă tŏng gum dêi pó a mâu roh hôp tơpui tơno hên pâ, kum tơdjuôm ivá tơleăng mâu pơloăng mơnúa lâp plâi tơnêi.