Tiô pơchuât tơbleăng, cheăng hbrâ mơdât mâu ngế xôi, pro xôi luât pơtối châ tơkŭm pêi ki xiâm; cheăng hbrâ mơdât mâu ngế xôi rế hía rế châ tơbleăng tiô tơdroăng ki trâu hơngế.

Mâu tơdroăng pơkâ dêi Kuô̆k hô̆i châ pơcháu hiăng pêi pro klêi, ai mâu tơdroăng pơkâ hiăng tơkâ luâ tâ tơdroăng pơcháu. Tiô tối tơbleăng dêi dêi Chin phuh ‘na cheăng pêi pro luât, hơnăm 2024 ai mâu tơdroăng pêi pro klêi ƀă ai kơxô̆ liăn pơkâ hên má môi ing nah troh nôkố. Tơdroăng kuăn pơlê troh tíu pêi cheăng tơdah kuăn pơlê dêi mâu kơ koan cheăng dêi Kuô̆k hô̆i, Khu kăn Kuô̆k hô̆i kơdroh la mâu hlá đơn pơsăm tối, pơsăm tơkêng, pâ thế, tối dêi kuăn pơlê pơtroh ăm mâu kơ koan dêi Kuô̆k hô̆i, tâk lối 1 rơpâu hlá đơn tâng pơchông ƀă hơnăm 2023.

Mâu kăn tối tiah kố, cheăng tơdah kuăn pơlê, pơkâ tơleăng tơdroăng pơsăm tối, pơsăm tơkêng, tối ‘na tơdroăng hlá mơ-éa dêi Kuô̆k hô̆i ƀă khu kăn Kuô̆k hô̆i cho hnoăng cheăng ki kal, mơhno hnoăng cheăng pôu râng ƀă kuăn pơlê kal tơrŭm ing Tơnêi têa troh kong pơlê. Vâ mơdêk tơƀrê, kal mơjiâng phần mềm pơkuâ ngăn tơdroăng pơsăm tối, pơsăm tơkêng tơkŭm, tơdjêp mâu tơdroăng ki kal pơla mâu vâ séa ngăn tâi tâng mâu rôh pơkâ tơleăng ing ki rah xo troh tơleăng.