Mâu khu xiâm ki veăng roh hôp, mê cho: Khu xiâm pơkuâ lêng, Khu xiâm tơpui kâ, Khu ngăn ‘na pơtâng tơdroăng nếo ƀă Hlá tơbeăng ƀă 8 kong pơlê, pơlê kong kân mê cho: Hà Nội, Pơlê kong kân Hồ Chí Minh, Hải Phòng, Đà Nẵng, Cần Thơ, Quảng Ninh, Hải Dương, Tây Ninh. Tiô tơbleăng dêi 3 khu xiâm, 8 kong pơlê, tung pơla kố nah tơdroăng pêi pro, chêh bro mâu hlá mơ-éa tơnêi têa, pơtroh ăm tơdroăng pro mơ-éa tơnêi têa, mâu khu xiâm, kong pơlê hiăng ai hên tơdroăng mơ-eăm ƀă ai mâu tơdroăng châ tơƀrê ki má môi.

Xông tơpui a roh pêi cheăng, pôa Nguyễn Hòa Bình, Ngế pro xiâm phŏ hnê hnê mơhno má môi Chin phuh tối nhên, kố cho môi tung mâu hnoăng cheăng ki xiâm, troăng pêi ki xiâm mơjiâng ivá rak tơniăn ƀă mơdêk tơtêk cheăng kâ, pro tơniăn tíu mơ’no liăn cheăng tê mơdró. Tơdrêng amê tối nhên, pơkâ xiâm mơ-eăm mơjiâng tíu pro mơ-éa phuâng tơ’lêi lĕm, xua kuăn pơlê kum pêi cheăng – kố xuân cho hnê mơhno kơtăng dêi Đảng, Tơnêi têa pin.

Tơdroăng kơnó mâu tíu ki kreăng, ki ối pá kô tah lôi châ mâu tơdroăng ki pá puât, pro tơ’lêi hlâu ăm kuăn pơlê, khu tê mơdró drêng pêi pro mâu mơ-éa pêi cheăng.