Ƀă phôn râng kŏng ki chal nếo ai tơdjêp măng Internet, bu ‘nân to a hngêi, pôa Y Kơn Niê ối khĕn cho pôa Uyên, a pơlê Ea Đun, cheăm Ea Kênh, tơring Krông Pač xuân tơ’lêi hlâu vâ nâp on tơhrik, nâp card phôn râng kŏng. Pôa Y Kơn tối, sap ing túa pơkâ “Kơpong kuăn pơlê rêh ối xúa kơmăi kơmok kơxô̆” châ tơbleăng a pơlê, pôa ƀă hên kuăn pơlê ki ê hiăng hlê tâ ‘na tiah lâi cho kơmăi kơmok kơxô̆ ƀă rế hía rế xúa kơmăi kơmok kơxô̆ tung mâu tơdroăng cheăng rêm hâi.

Pôa Y Kơn Niê tối:

“Á hlo ai hên tơdroăng ki pơxúa, môi tiah hdrối nah mê liăn nâp on tơhrik pin athế lăm nâp xêh tíu ki vâ xo, la nôkố kơnôm ing hơ’lêh kơxô̆ mê bu ối to a hngêi nâp ing phôn râng kŏng. Tiah mê, gá tơ’lêi hlâu khât, ôh tá êa lăm nâp a tíu ki vâi xo, pin nâp drêng lâi xuân chiâng. Cài đặt app a phôn râng kŏng mê xuân tơ’lêi khât”.

Ƀă ngoh Y Blen Niê, ngế ki pơkuâ ngăn Đoân Droh rơtăm ƀuôn Ea Đun, kơnôm ai kơmăi kơmok kơxô̆, tơdroăng ki tơbleăng mâu tơdroăng cheăng, tơdroăng tơ’noăng Đoân Droh rơtăm lơ tơbleăng ăm đoàn viên droh rơtăm tung pơlê hiăng chiâng tơ’lêi hlâu tâ, rĕng tâ há. Mâu đoân viên droh rơtăm xuân hbrâ rơnáu tâ tung tơdroăng ki châ xo tơdroăng tơbleăng ƀă vêh tơbleăng rĕng há.

Thăm nếo, kơnôm ing kơmăi kơmok kơxô̆ hiăng kum kơdĭng hâi chôu, gá tơ’lêi hlâu khât drêng ai mâu tơdroăng ki kal pêi pro tơdrêng kal tơbleăng.

Ngoh Y Blen Niê tối:

“Á mơjiâng mâu khu vâ nhăn tin tơbleăng ing Zalo, Messenger, Facebook ƀă xúa mâu khu kố vâ nhăn tin tơbleăng ăm đoân viên chi đoân pơlê Ea Đun ‘na chôu phut. Hlo tiah kố gá tơƀrê khât, thăm nếo á ối to môi tíu xuân chiâng vâ tơkŭm hôp tơ’lêi hlâu ing Zalo, Facebook”.

Ƀuôn Ea Đun nôkố ai vâ chê 1.500 pơ’leăng mâ mơngế ối tung 7 hdroâng kuăn ngo rơtế rêh ối, tung mê hdroâng kuăn ngo akố châ ối tơdế. Tiô pôa Nguyễn Khắc Hiệp, kăn pơkuâ chi ƀô̆ hlối cho ngế pơkuâ ƀuôn Ea Đun, kơnôm ing hơ’lêh hdrê pêt châ tơƀrê khât. Pêi lo liăn rêm ngế tung hơnăm hdrối nah châ 55 rơtuh liăn môi ngế tung môi hơnăm. Ki hên kuăn pơlê sap ing 16 hơnăm tơngi klêng pơrá xúa phôn râng kŏng ai tơdjêp măng 4G, xúa măng Wifi.

Sap ing tơdế khế 12, hơnăm 2022, ƀuôn Ea Đun hiăng tơbleăng túa pơkâ “Kơpong kuăn pơlê rêh ối xúa kơmăi kơmok kơxô̆”, mơjiâng tôh “kong ngê̆ kơxô̆ tung pơlê pơla” ƀă 5 ngế ki xiâm xua ngế ki pơkuâ pơlê bro tôh trưởng. Sap ing pơxiâm mơhno mâ, tôh Kong ngê̆ kơxô̆ pơlê pơla hiăng tối tơbleăng ‘na mâu tơdroăng ki xúa tơdroăng ki mơ’no ing hyôh Internet, mâu tơdroăng ki séa ngăn nâp liăn ôh tá êa nâp liăn mâ, phần mềm ƀaoh hiêm khăm pơlât, ƀaoh hiêm pơlê pơla, túa ki séa ngăn tơdroăng ki hơniâp tuăn dêi kuăn pơlê ƀă kăn ƀô̆, kong chưk cheăm ing xúa Zalo, hnê xúa Internet tơniăn ƀă hên ki ê.

Tíu pêi cheăng tơrŭm bro nhŏng o ƀă pơlê xuân hiăng diâp mâu cước Wifi tê kơtê ăm vâi krâ nhŏng o vâ mơhnhôk kuăn pơlê châ ‘nâ ƀă xúa kong ngê̆ kơxô̆, mơdêk xúa mâu tơdroăng ki xúa ing troăng hyôh Internet.

Pôa Nguyễn Khắc Hiệp tối tiah kố, ƀă túa pêi dêi tôh kong ngê̆ kơxô̆ pơlê pơla cho lăm troh a rêm hơlâ, tơgôu a rêm hngêi vâ hnê tối ‘na hơ’lêh kơxô̆, kuăn pơlê a ƀuôn Ea Đun kô rế hía rế hơ’lêh túa ki hmâ ƀă mơdêk kơlo ki xúa kong ngê̆ kơxô̆.

“Ing mâu rôh hôp kuăn pơlê xuân môi tiah mâu rôh tơkŭm mâ, mê tôh xuân tối trâu hơngế ăm vâi krâ nhŏng o, xuân hnê tối, mơhnhôk vâi krâ nhŏng o veăng tung tơdroăng ki xúa kong ngê̆ kơxô̆. Mê kố cho ki xiâm má môi tơdroăng pơkâ dêi Đảng ƀă má péa nếo cho kum ki pơxúa ăm rêm ngế kuăn pơlê tung tơdroăng ki tê rôe, hơ’lêh xuân môi tiah tung tơdroăng ki xúa kong ngê̆ kơxô̆ tung tơdroăng rêh ối dêi vâi krâ nhŏng o.

Tơná á mê ki hên cho xúa Internet, iâ tơbleăng ing loa la tơbleăng ing mâu troăng kialo, Facebook...ƀă ngin mơjiâng trang Zalo tôh kong ngê̆ pơlê pơla dêi ƀuôn. Maluâ drêng lâi vâi krâ nhŏng o mot tung mâu mah QR Code tôh kong ngê̆ pơlê pơla mê mâu tơdroăng ki ai tơdjâk troh vâi krâ nhŏng o pơrá châ hlo tâi.

Jâ Trần Thị Vân, kăn phŏ hnê ngăn Vi ƀan cheăm Ea Kênh, tơring Krông Pač ăm ‘nâi, xúa, tơdroăng tơ’noăng “Hơ’lêh kơxô̆ hneăng hơnăm 2022 – 2025”, xua Vi ƀan hnê ngăn tơring Krông Pač tơbleăng, cheăm mơhnhôk tá khu pơkuâ tơdroăng kal kí rơtế ƀă khu tơrŭm, khu mơdró kâ ƀă mâu kuăn pơlê veăng vâ rơtế bro tơdjâk tơdroăng tơ’noăng kố troh tâi tâng mâu thôn, pơlê, tôh kơphô̆. Sap ing túa pơkâ ki apoăng xua Vi ƀan hnê ngăn tơring Krông Pač mơjiâng a thôn Tân Đông, cheăm Ea Kênh, troh nôkố, cheăm hiăng tơbleăng tíu bro a ƀuôn Ea Đung, cho pơlê ki xiâm ƀă ki hên tíu rêh ối cho hdroâng kuăn ngo, ki hlê plĕng dêi kuăn pơlê ôh tá tơ’mô.

Apoăng hlo kuăn pơlê pêi pro kơhnâ khât, mơdêk tơdroăng ki xúa hơ’lêh kơxô̆ tung mâu tơdroăng môi tiah ‘na nâp liăn ki kố ki mê.

“Tung la ngiâ mê vâ mơdêk hnoăng cheăng dêi tôh kong ngê̆ kơxô̆ mê cheăm xuân hiăng mơjiâng túa pơkâ tâi tâng thôn, pơlê a cheăm kô mơhno kơpong kuăn pơlê rêh ối xúa kong ngê̆ kơxô̆ kố, vâ ăm kuăn pơlê châ xúa mâu tơdroăng ki xúa ai tơdjâk troh kong ngê̆ kơxô̆ môi tiah nâp liăn ki ôh tá kal nâp liăn mâ, nâp liăn ing troăng hyôh Internet tơdjâk ‘na liăn on tơhrik, nâp hnoăng liăn mơhá ƀă mâu tơdroăng nâp ki ê”.

Sap ing mâu tơdroăng ki tơƀrê ki apoăng, túa pơkâ “Kơpong kuăn pơlê rêh ối xúa kơmăi kơmok kơxô̆ hiăng châ tơdjâk troh hên thôn, pơlê a tơring Krông Pač, ƀă lối 250 tôh kơmăi kơmok kơxô̆ pơlê pơla châ mơjiâng, a lâp lu mâu thôn, pơlê, tôh kơphô̆. Mâu tôh ki kố ai tơdroăng ki veăng dêi hên ngế môi tiah khu rak ngăn, khu rak ngăn hnoăng cheăng măt trâ̆n, hô̆i viên mâu chi hô̆i khu khu pơkuâ, thái cô, kŏng an viên, droh rơtăm ƀă hên ki ê.

Ing mê, veăng kum ăm tơdroăng ki hơ’lêh kơxô̆ châ mot trâu hngế tung tơdroăng rêh ối sap ing thôn pơlê ki tơ’lêi hlâu troh kơpong hngế hngo, kơpong malối xơpá.