Kong hiăng vâ rơmâng trê pơtrêu, mâu pul on ki xúa ing hyôh tô dêi mâ hâi ing mâu Hngêi ki pro bâ eăng drô troăng tíu tơkăng kọng a cheăm tơkăng kong Krông Na, tơring Ƀuôn Đôn hiăng séa bâ eăng. Ngoh Y Hán Hwing - Đăi ŭi - Kăn pơkuâ ngăn Mơhnhôk kuăn pơlê, Đông gak tơkăng kong Srêpok, cho ôí tung Khu Mô đô̆i gak tíu tơkăng kong Dak Lak ai tối, ai on bâ eăng vâ kum ăm mô đô̆i lăm pơtrui, mâu vâi ngoh thăm rế chân tuăn hdrối vâ pêi dêi hnoăng cheăng:

“Sap ing hâi ki krâ On bâ eăng drô troăng tíu tơkăng kong a troăng lăm pơtrui tơkăng kong ga tơ’lêi khât ăm mâu kăn ƀô̆, mâu lêng tung đông tung pơla lăm pơtrui, rak ki tơniăn ‘na tơdroăng prôk lăm. Ki má péa, veăng kum rĕng châ ‘nâi nhên mâu khu ngế ki lơ vâ pro tơ’nhê drô troăng tíu tơkăng kong, ing mê, kum tơ’lêi hlâu tung pơkuâ ngăn, rak vế ngăn, hnối kring vế tíu tơkăng kong dêi đông”.

Hngêi ki hrik ‘no hyôh tô trâ mâ hâi vâ mơ’no ăm mâu pul on bâ eăng drô troăng tíu tơkăng kong xua Đông Gak tơkăng kong Srêpok pơkuâ ngăn ga xŏn dâng 3 km, tung mê ai 20 tíu ki hrik ‘no hyôh tô trâ dêi mâ hâi, krâ mâu pul on a kơpong ai tơneăn drô troăng tíu tơkăng kong kơxô̆ 45 (2), mâu tơneăn ki pa rŏng ƀă drô mâu troăng lăm pơtrui dêi đông. Tơmeăm khoăng kố cho xua Khu pơkuâ ngăn Đoân droh rơtăm kong pơlê Dak Lak ƀă mâu khu ki pêi pro tung khế 3 hơnăm kố, drêng koh tơbâ 65 hơnăm hâi mơjiâng Mô đô̆i gak tơkăng kong.

Nâ H’Giang Niê, Kăn pơkuâ hnê ngăn Đoân Droh rơtăm kong pơlê Dak Lak tối ăm ‘nâi, Đông gak tơkăng kong Srêpok cho tíu cheăng ki má 2 a kong pơlê châ mơjiâng hngêi ki vâ hrik ‘no hyôh mâ hâi ăm troăng tơkăng kong tung hơnăm kố. Kố xuân cho môi tung 2 tơdroăng cheăng ki xiâm dêi khu rơxông nếo Dak Lak pơkâ pêi pro tung hơnăm vâ tơ’noăng hnoăng cheăng koh tơbâ 120 hơnăm hâi mơjiâng kong pơlê Dak Lak.

“Hơnăm kố, ngin ai pơkâ khŏm mơjiâng 27km troăng ki bâ seăng a tíu tơkăng kong. Troh a chôu phut kố, ngin hiăng mơhnhôk mâu khu râ tung kong pơlê ƀă  kong pơlê ê, hơniâp ro khât xua châ ai tơdroăng ki veăng, tŏng kum dêi mâu vâi pú đoân viên, droh rơtăm ƀă tơdroăng rơtế pêi pro, tŏng kum dêi mâu khu mơdró kâ, mâu kong pơlê pú hmâ vâ ngin rak vế, pêi pro tơdroăng pơkâ dêi hnoăng cheăng tơná. Kố cho môi tơmeăm khoăng ki rơtế ƀă mâu đông lêng tíu tơkăng kong, rêm trăng on mê cho môi tơneăn ki rêh vâ vêh mơnhên hnoăng pơkuâ tíu tơkăng kong dêi Việt Nam”.

Thươ̆ng tă Rơlan Ngân, Kan phŏ pơkuâ hnê ngăn Đảng Mo đô̆i Gak tơkăng kong Dak Lak tối mơnhên: mâu tơmeăm khoăng ki pro bâ troăng tíu tơkăng kong mê ti xê to mơhno tối hiâm mơno tŏng kum dêi Đoân Droh rơtăm ƀă khu Mô đô̆i Gak tíu tơkăng kong mê ối veăng kum hnê mơhno hnoăng cheăng kăch măng, hnoăng  kring vế, gak ngăn tíu tơkăng kong ăm đoân viên droh rơtăm. Ƀă rêm ngế, tơmeăm khoăng kố châ tơdah xo, mâu đông mô đô̆i kô pơtối lăm séa ngăn, ‘mâi rơnêu vâ xúa châ tơƀrê, ton xŏn.

‘’Ngin hâk mơnê păng ‘nâng kơnôm châ tơdroăng tŏng kum dêi mâu kăn rêm râ. Tung mê, ai Khu pơkuâ ngăn Đoân Droh rơtăm kong pơlê Dak Lak ƀă Khu pơkuâ ngăn Đoân Droh rơtăm kong pơlê Bình Dương hiăng tŏng kum ngin mâu pul on ki vâ trâ bâ eăng drô troăng tíu tơkăng kong. Ngin kô xúa mâu pul on kố tro tơdroăng ƀă rak tơniăn vâ kring vế hoăng cheăng ƀă xuân veăng kum pro ƀlêi chiâng hnoăng cheăng kal kí dêi mâu kơ koan, đông lêng hiăng pơcháu ăm Mô đô̆i gak tơkăng kong dêi kong pơlê, rak vế pêi pro hnoăng cheăng tung la ngiâ’’.

Kong pơlê Dak Lak ai dâng 73km troăng tơkăng kong, tơdjêp ƀă kong pơlê Mondukri, kong têa Kul. Ƀă tơmeăm khoăng ki bâ eăng troăng tíu tơkăng kong a drô troăng tơkăng kong xua Khu rơxông nếo Dak Lak tŏng kum tung hơnăm kố, tiô tối hdrối kô pơtối krâ mâu pul on bâ eăng tíu tơkăng kong xua Mô đô̆i gak tơkăng kong Dak Lak pơkuâ ngăn, rak vế. Ƀă tơrêm môi trăng on châ bâ eăng, tí xê to tŏng kum tơ’lêi ăm mâu kăn ƀô̆, lêng tơkăng kong a drô troăng gak ngăn tíu tơkăng kong mê ối pro bâ eăng hnoăng cheăng a tơrêm xơtá tơnêi ki krih tíu tơkăng kong dêi Tơnêi têa.