Tiô Túa pơkâ kong pơlê Dak Lak pơla hơnăm 2021 – 2030, hnoăng vâ pêi troh a hơnăm 2050, pơlê kong krâm Ƀuôn Hồ cho kơphô̆ kong kế nhâ loăng têa râ kơpong, tíu xiâm kơpong Tây Nguyên. Kố xuân cho tíu xiâm tê mơdró dêi kơpong cheăng kâ tơdjêp pơla kơpong Tây Nguyên, kơpong tơbăng peăng Tơdế tơnêi têa Nam Trung ƀộ ƀă kơpong peăng mâ hâi lo ‘na kơnhŏng Kul.

Ing pơkâ tơdjuôm, Vi ƀan hnê ngăn pơlê kong krâm Ƀuôn Hồ hiăng bro tơdroăng pơkâ ‘mâi rơnêu Túa pơkâ tơdjuôm pơlê kong krâm Ƀuôn Hồ troh hơnăm 2045 ƀă hiăng châ Vi ƀan hnê ngăn kong pơlê kĭ. Ki xiâm cho tơmiât troh mơjiâng ƀă mơnhông pơlê kong krâm Ƀuôn Hồ chiâng môi tung mâu tíu xiâm kal kí, cheăng kâ, túa lĕm tro, khoa hok kih thuât ƀă ôm hyô kơpong peăng kơnhŏng dêi kong pơlê Dăk Lak.

Túa pơkâ ôh ti xê cho tơdroăng luât ki kal ăm tơdroăng pơkuâ ngăn, ‘no liăn mơnhông kơphô̆, mê ối ai pơxúa kal khât tung tơdroăng cheăng la ngiâ mơjiâng ƀă mơjiâng pơlê kong krâm; bro ivá, rôh tơ’lêi ăm pơlê kong krâm Ƀuôn Hồ pơxiâm mơnhông ƀă mơdêk ki ai hlâu, tơ’mot mâu kơxô̆ liăn ‘no mơjiâng.