A rôh hôp, mâu kăn mơnhên tối, Têt Quý Mão hơnăm 2023 hiăng châ tơkŭm po hơniâp ro, phâi hơtô, rak tơniăn, kơdĭng. Tiah mê, tung rôh Têt Lo hơnăm nếo hnoăng cheăng hbrâ mơdât pơreăng, khăm pơlât; rak vế krúa lĕm kế kâ châ tơkŭm pêi pro kơtăng. Sap ing hâi lơ 20 – 26/1/2023, ôh tá ai ngế ki lâi tro hơ’ou kế kâ. Mâu ngế ki ai hnoăng tơnêi têa, đoân viên, mâu ngế pêi cheăng cho mâu ngế kơtiê, mâu rơpŏng kuăn pơlê ki trâm tơdroăng xơpá pơrá châ tŏng kum Têt, ƀă tâi tâng kơxô̆ liăn tŏng kum tung pơla Têt dêi 63 to kong pơlê châ dâng 9.500 rơtal liăn kum lối 25 rơtuh ngế.

Hnoăng cheăng hbrâ roê mâu kế tơmeăm tŏng kum Têt hiăng châ mâu kong pơlê ƀă mâu khu mơdró kâ ki mơjiâng bro ƀă tê mơdró tơbleăng tŏng kum sap ing hdrối. Mâu kế tơmeăm châ tơbleăng tŏng kum hên hĭn, yă tê ôh tá hơ’lêh hên; ôh tá ai tơdroăng ki ôh tá bê kế tơmeăm, malối cho ‘na têa châu têa kơxăng. Tơdroăng ki ‘no on tơhrik tơnêi têa tung rôh Têt tơniăn. Mâu tơdroăng cheăng mơhno túa lĕm tro, tơ’noăng ivá, ôm hyô ƀă hnê tối châ tơkŭm po ƀă hên tơdroăng ki rơkê tơtro ƀă hơniâp ro, bro chiâng hên mơngiơk ‘na mơhno túa lĕm tro hơniâp ro.

Mơgêi rôh hôp, pôa Phạm Minh Chính, Ngế pro xiâm hnê ngăn Chin phuh pơkâ thế mâu khu xiâm, kơvâ cheăng, kong pơlê rĕng pêi cheăng, pôi tá hrá ah chiâng tơdjâk troh mâu tơdroăng cheăng mơjiâng bro, tê mơdró, mâu tơdroăng cheăng kâ rêh ối pơlê pơla; ôh tá tơkŭm po mâu tơdroăng cheăng ki lăm xah hêi rơnó hơngui, rơkâu Têt bro tơdjâk troh tơdroăng cheăng, hâi chôu pêi cheăng; mơ-eăm pêi klêi hnoăng cheăng sap ing apoăng hơnăm vâ veăng kum pêi pro ƀlêi chiâng mâu tơdroăng pơkâ, hnoăng cheăng mơnhông mơdêk cheăng kâ rêh ối pơlê pơla hơnăm 2023.