Tung roh hôp tối tơbleăng tiah hmâ dêi Khu xiâm ngăn ‘na tơpui kâ tơnêi têa pin po a peăng xêi hâi lơ 29/2 a Hà Nội, tiâ rơkong mâu tơdroăng ki ai tơdjâk troh hiâm tuăn dêi Việt Nam drêng Sinuâ mơ’no dêi tuk troh pêi cheăng a Chuăn Tư Chính, ối tung kơpong têa kơxĭ Việt Nam, Ngế cheăng tung Khu xiâm tơpui kâ tơnêi têa pin jâ Phạm Thu Hằng hiăng tối nhên: Tuăn mơno dêi Việt Nam ƀă chuăn Tư Chính cho sap ing nah troh nôkố xuân cho ki tơnêi têa ki Việt Nam. Tiah mê, chuăn Tư Chính cho môi pâ dêi tung kơpong têa kơxĭ Việt Nam ƀă hiăng châ mơnhên hrâ hrế, tŭm têk tơtro ƀă Luât Têa kơxĭ dêi Khu lâp kong têa hiăng pơkâ a hơnăm 1982.

Việt Nam khŏm mơ-eăm tơtrâ rơdêi ó rêm tơdroăng ki tong tơbriât hnoăng pơkuâ, hnoăng rak ngăn, hnoăng pơkâ luât ƀă mâu kơpong têa kơxĭ dêi Việt Nam, xua ga, hiăng châ mơnhên tối tŭm têk, tơtro ƀă Luât dêi Lâp plâi tơnêi, ki rơhêng vâ tối cho Luât Tơkêa dêi Khu lâp kong têa pơkâ ‘na Têa kơxĭ hơnăm 1982. Việt Nam hiăng ƀă dế kơdo mơ-eăm kring vế, rak ngăn dêi hnoăng, ƀă ki ai pơxúa tơtro luât, tơxâng a têa kơxĭ dêi tơná tiô kơ troăng hơlâ ki hơniâp lĕm, tơtro ƀă luât dêi lâp plâi tơnêi.