Mâu hâi kố, mơhé hiăng tâi roh pơtê Têt Lo hơnăm nếo laga pơlê kong kơdrâm Đà Lạt, Lâm Đồng xuân mơhnhôk tơmối troh ôm hêi, pơtê pơto. Hơnăm kố, hneăng pơtê Têt Lo hơnăm nếo ton, ƀă kong prâi rơngiâp lĕm, xua mê Đà Lạt – Lâm Đồng mơhnhôk kơdrâm tơmối troh ôm hyô, pơtê pơto. Kơdrâm tơmối, mâu tíu mơdró ôu kâ a kơpong tíu xiâm ai drêng lối hâ ho laga tŭm tơdroăng xuân kêi đeăng lĕm ƀă tơniăn.

Tơtrŏng má môi, xua kơxô̆ tơmối ôm hyô troh ôm hyô lâp lu tơdâng, ôh tá tâk môi xôh, xua mê hngêi ăm tơmối kâ koi ối pơtê, hngêi koi pơtê bê ăm tơmối troh ối pơtê koi kơmăng. Tiô kơvâ ôm hyô kong pơlê Lâm Đồng, tâi tâng kơxô̆ tơmối ôm hyô troh lăm ngăn, ôm hêi a pơlê kong kơdrâm Đà Lạt roh Têt kố châ 250 rơpâu roh, tâk 2,5 xôh tâng pơchông ƀă Têt Lo hơnăm nếo dêi hơnăm nah; tung mê ai 12 rơpâu 500 roh tơmối lâp plâi tơnêi. Nôkố mơhé hiăng tâi roh pơtê Têt Lo hơnăm nếo laga Đà Lạt – Lâm Đồng xuân pơtối mơhnhôk kơdrâm tơmối ôm hyô troh xah hêi rơnó Hơngui.