Klêi kơ’nâi mâu hâi pơtê Têt tiô khôi hmâ Quý Mão, kơxo lơ 27/1, tơkéa vâ tối hâi má 6 Têt, mâu kơ koan, khu râ, kơvâ cheăng, khu mơdró kâ a kong pơlê Dak Lak hiăng pơtối vêh pêi cheăng tiah hmâ la ro kơhnâ khât. A tíu xiâm ƀơrô cheăng dêi kong pơlê Dak Lak, tung hâi pêi cheăng hâi ki apoăng klêi kơ’nâi mâu hâi pơtê Têt Lo hơnăm nếo, kơxô̆ kuăn pơlê lăm troh a Ƀơrô xuân tá hâi teăm hên to lâi ôh. Maluâ ti mê, tâi tâng mâu kăn ƀô̆, mâu ngế pêi cheăng hiăng vêh pêi dêi hnoăng cheăng tung tơdroăng ki hơniâp ro, hbrâ vâ tŏng kum lĕm tro má môi ăm kuăn pơlê.

A kơpong hngêi kơmăi Tân An, Kŏng ti tơlo liăn cheăng Ban Mê (Grin Fam) Green Farm tơkŭm lo pêi cheăng, uâ mơdiê plâi sầu riêng hiăng vâ mơ’no tê dêi kế tơmeăm ki apoăng troh a kong têa Sinuâ, Nhuk. A kơdrum klâng chiâk, tung mâu hâi hdrối mê hía nah, kuăn pơlê Dak Lak xuân hiăng pơtối vêh pêi dêi hnoăng cheăng rak ngăn hdrê loăng pêt, mơnăn păn klêi kơ’nâi mâu hâi pơtê Têt Lo hơnăm nếo. Kố cho tơdroăng ki hơniâp ro, veăng kum tung tơdroăng ki pêi pro ƀlêi chiâng mâu hnoăng cheăng kâ, rêh ối pơlê pơla dêi hơnăm 2023 kố.