A rôh tơ’noăng hok tro rơkê dêi tơnêi têa, kong pơlê Dak Lak châ 72 pri, tung mê, ai 2 pri ối má môi. Kố cho tơdroăng ăm hlo ki hên má môi riân sap ing nah ta troh nôkố, ối má 16 tung lâp tơnêi têa, pơtối ối má môi tung mâu kong pơlê tung kơpong Duyên hải Nam Trung bộ ƀă Tây Nguyên.

Malối, ai 4 ngế hok tro châ mot tung khu tơ’noăng tơnêi têa lăm tơ’noăng Olympic kơpong ƀă lâp plâi tơnêi hơnăm 2025; 1 ngế hok tro châ teăng mâ Việt Nam lăm tơ’noăng Olympic  Tin học châu Á-Thái Bình Dương.

A rôh leh khĕn kơdeăn, kăn hnê ngăn kong pơlê Dak Lak tối ƀă khĕn kơdeăn mâu tơdroăng ki mơ-eăm dêi mâu thái cô hnê ƀă mâu vâi o hok tro tung hơnăm nah, pâ thế kơvâ Hnê hriâm ƀă hnê mơjiâng tuăn ngôa rơkê kong pơlê pơtối rak hnoăng ki mê, tơmâng khât a tơdroăng hnê tŭng tŭm tơdroăng ƀă tung mâu rôh tơ’noăng hok tro rơkê rêm râ.