Nôkố, tơdroăng ki roê tơmeăm xúa phôn râng kŏng ki rơkê (smartphone) quet mah QR ăm liăn lơ pơtroh ing tài khoản hiăng xúa hên hĭn a mâu tíu tê tơmeăm, kơchơ tê tơmeăm a pơlê kong kơdrâm Ƀuôn Ma Thuột. Jâ Đinh Thị Thanh 60 hơnăm, ối a bêng Tự An tối, to lâi hơnăm hdrối drêng kơchơ lơ siêu thĭ roê tơmeăm đi đo athế hbrâ môi iâ liăn mâ vâ roê tơmeăm. La vâ chê 2 hơnăm vêh ngi kố, mâu tơdroăng ki roê tơmeăm iâ xúa liăn mâ, teăng a mê cho xúa phôn râng kŏng quet mah QR lơ pơtroh liăn roê tơmeăm ing tài khoản. Jâ tối tiah kố, tơdroăng ki ăm liăn môi tiah nôkố gá tơ’lêi hlâu khât:

“Á kâ liăn ki hiăng pơtê cheăng mê ing rôh ki mê nah troh nôkố pơrá pơtroh liăn ing tài khoản ATM, hdrối nah lăm kơchơ lơ siêu thĭ xuân ăm liăn ing mah quet QR, ôh ti kal xo liăn a kơmăi ATM xếo. Á lăm kơchơ Phan Chu Trinh, Tân An, lơ kơchơ kân pơlê kong kơdrâm Ƀuôn Ma Thuột, mê á roê tơmeăm ing mâu ki ê kơchâi, châi hơ’nêh mâm, ká plâi reăng, hmân ếo pơrá ai mah QR in meăm lơ a phôn râng kŏng vâi vâ ăm pin quet mah mơdrếo. Á hlo tơ’lêi khât, ôh tá xâu tro ăm rơlối, lơ ăm ôh tá tŭm kơxô̆ liăn ki pin roê ƀă hên ki ê’’.

Jâ Nguyễn Thị Liên, klêi kơ’nâi vâ chê 20 hơnăm tê plâi reăng a kơchơ Tân An, pơlê kong kơdrâm Ƀuôn Ma Thuột ăm ‘nâi, jâ hiăng hriâm ƀối túa ki ăm liăn ôh tá xúa liăn mâ ing mâu khu tê tơmeăm tâ tá jâ. Tơdroăng ki ăm liăn ing phôn hiăng kum jâ hên tơdroăng ăm tá khu ki tê tá  mâu tơmối ki roê tơmeăm.

“Tối tơdjuôm mâu tơmối vâi roê tơmeăm ăm liăn mâ ah hmôu pơ mơdrếo vêh mơdrếo lăm xuân ton. Ai rôh ki ‘nâ tơmối roê tơmeăm vêh mơdrếo 20 rơpâu liăn lơ 30 rơpâu liăn, mê vâi ăm 50 rơpâu liăn mê á ôh ti ai liăn mê athế lăm pơhlêh liăn, gá xơpá khât. Tơdroăng ki quet mah ăm liăn mê gá tơ’lêi. Á rơhêng vâ tơdroăng ki ăm liăn ing quat mah QR mê athế tơbleăng pro troh hên tíu tâ vâ vâi krâ nhŏng o tơ’lêi tâ hdrối nah. Xua hdrối nah ai hên roh vêh mơdrếo liăn ôh ti tro ăm hên ngế, mê quet mah QR gá ôh ti tiah hmâ ƀă tơ’lêi hlâu tâ ăm liăn mâ’’.

Tiô hngêi rak liăn Tơnêi têa Việt Nam tíu pêi cheăng a Dak Lak, klêi kơ’nâi vâ chê 2 hơnăm tơbleăng pêi pro ‘’Tơdroăng tơ’lêi, rĕng ăm liăn la ôh tá xúa liăn mâ a Việt Nam pơla hơnăm 2021 – 2025’’, troh nôkố, mâu hngêi rak liăn a Dak Lak hiăng po lối 2.600.000 tài khoản ăm kuăn pơlê. Ki rĕng ‘na tơdroăng ki xúa tài khoản ing phôn râng kŏng ki rơkê châ 50 – 80% tung môi hơnăm; mâu ngế krê, khu tơrŭm xúa tơdroăng ki mơdrếo liăn ôh tá xúa liăn mâ ing mâu troăng điê̆n tưh châ 40%. Mâu kơvâ cheăng khăm pơlât, Hnê hriâm hiăng châ tơdế mâu ngế krê, khu tơrŭm xúa tơdroăng ăm liăn rĕng điê̆n tưh, nâp liăn mot pơlât a hngêi pơkeăng, nâp liăn hriâm ki ôh tá xúa liăn mâ.

Jâ Phùng Thị Thơm – Kăn phŏ pơkuâ Ƀơrô cheăng, khu ngăn tơdroăng ki tối tơbleăng tơdroăng kal ing troăng hyôh um tơvi Dak Lak tối, tung lâp kong pơlê hiăng mơjiâng 1.426 tôh pêi cheăng kơxô̆ pơlê pơla, ƀă 9.278 ngế pêi cheăng. Mâu tôh kố kô kum tơdroăng ki hơ’lêh kơxô̆; cài đặt inâi điê̆n tưh VneID; hnê rơpŏng ki tê mơdró, kuăn pơlê a kong pơlê chêh inâi ƀă xúa tơdroăng ki ăm liăn ôh tá kal xúa liăn mâ; hnê pro tài khoản ƀă nâp hồ sơ tơdrêng ing troăng hyôh internet. Jâ Thơm ăm ‘nâi:

“Vi ƀan hnê ngăn kong pơlê hiăng mơjiâng mâu tôh kơmăi kơmok kơxô̆ pơlê pơla ing kong pơlê troh a tơring, cheăm ƀă mâu thôn pơlê lơ  tôh kơphô̆. Hơnăm 2024, Khu kô tơbleăng troăng pơkâ ƀă hnê mâu cheăm, bêng a mâu tôh kơmăi kơmok kơxô̆ pơlê pơla kố mơnhông tơƀrê tâ tơdroăng ki hnê kuăn pơlê ăm liăn ki ôh tá xúa liăn mâ’’.