Khế 7/2025, khế apoăng klêi kơ’nâi Dak Lak pêi pro klêi tơdroăng ‘mot tơkŭm kong pơlê ƀă cheăm, kơ koan cheăng kăn pơkuâ pơtối châ pơkâ xúa tơniăn, mơnhên mâu tơdroăng pơkâ pêi mơnhông cheăng kâ rêh ối pơlê pơla, tơdrêng amê hlối tơkŭm tung tơdroăng cheăng hbrâ rơnáu Hneăng hôp Đảng ƀô̆ kong pơlê rôh má 18, hơnăm 2025 – 2030.

Kố cho tơdroăng ki kal châ tối a Rôh hôp rôh má 3, Khu pơkuâ ngăn Đảng hneăng 17, po a kơxê lơ 30/7. ‘Na mơnhông cheăng kâ rêh ối pơlê pơla, tung khế 7, hên tơdroăng pơkâ pêi châ a kơlo ki tâk chía tơniăn. Tơdroăng pêi chiâk deăng hlo tơniăn, kơvâ păn mơnăn mơnoâ hlo tơniăn ‘na pơreăng tâ tú; tâi tâng kơlo kế tơmeăm tê ‘ngré tiô riân châ lối 9.600 rơtal liăn, tâk iâ tâng vâ pơchông ƀă khế hdrối.

Tê mơdró ‘mâi mơnhông rơdêi ƀă vâ chê 710 rơpâu ngế tơmối ôm hyô, tâk 41%. Nâp liăn tơnêi têa tiô riân châ lối 9 rơpâu rơtal liăn, tơ’mô 67% tiô tơdroăng pơkâ nâp tung hơnăm. Pôa Nguyễn Đình Trung, Kăn pơkuâ ngăn Đảng Dak Lak pơkâ thế rêm ngế kăn tung Khu pơkuâ ngăn Đảng pơtối séa ngăn mâu tơdroăng pơkâ pêi, tŏng gum mâu tơdroăng ki tro tơvâ tơvân tung mơjiâng pro tê mơdró kế tơmeăm, ‘no liăn cheăng tơdjuôm, pơhlêh chêh pro mâu mơ-éa ƀă pêi pro troăng hơlâ tŏng gum ăm kuăn pơlê kơpong hdroâng kuăn ngo.