Pêi pro tơdroăng pơtrui rup mâu ngế xôi roh hdrối, tung ƀă kơ’nâi Têt Lo hơnăm nếo Giáp Thìn 2024, rơtế ƀă mơdêk tơdroăng séa ngăn tơniăn troăng klông ƀă rơxế kơtâu, khu kan săt rak tơniăn troăng klông ƀă rơxế kơtâu Dak Lak thăm tơplâ mơdât, châ hlo, pơxâu phâk mâu ngế ki xôi luât a mâu troăng kân; mơdât mâu kế tơmeăm ki mơdât, tơmeăm ki rôe ing kong têa ê ôh tá tro luât.

Kong pơlê Dak Lak châ hlo 5 troăng kân tơnêi têa prôk hluâ mê cho: 26, 27, 29, 14, 14C ƀă hên troăng kân kong pơlê, tơdjêp ƀă mâu kong pơlê Dak Nông, Lâm Đồng, Gia Lai, Phú Yên ƀă Khánh Hòa. Tung hơnăm 2023, Kan sát rak tơniăn troăng klông ƀă rơxế kơtâu Kŏng an kong pơlê Dak Lak hiăng châ hlo, pơcháu ăm khu cheăng séa ngăn, pơxâu 99 ngế, 82 toăng rơxế tơdjâk troh mâu roh xôi luât a drô troăng kân, Kan săt rak tơniăn troăng klông ƀă rơxế kơtâu hiăng rup vâ chê 1 tâ̆n mlŏi, 1.540 tơdrong hât ôh tá tro luât, 10 tâ̆n phon rơvât ôh tá ‘nâi xiâm kối...

Krê tung 2 măng tĭng hdrối, mâu khu séa ngăn hiăng châ hlo, mơdât 13 roh tơdroăng tơdjâk troh ma tŭi, pơto mlŏi, hât ôh tá tro luât ƀă hía hé...