Dế rôe mâu tơmeăm Têt a Siêu thĭ Co.opmart pơlê kong kơdrâm Ƀuôn Ma Thuột, nâ Võ Thị Mỹ Hương, ối a bêng Tân Lợi, pơlê kong kơdrâm Ƀuôn Ma Thuột tối ăm ‘nâi, hơnăm kố xua cheăng kâ pá puât mê rơpŏng nâ bu rôe mâu tơmeăm ki kal tê.

“Rơpŏng xuân rôe mâu tơmeăm ki kal xúa rêm hâi vâ xúa tung roh Têt, xua pơreăng COVID, kuăn pơlê ối xâu pơreăng mê kuăn pơlê kơdroh lăm rôe tơmeăm, bu rôe mâu tơmeăm ki kal xúa tê’’.

Prôk rơtâ tá a kơchơ Tíu xiâm pơlê kong kơdrâm Ƀuôn Ma Thuột kô hlo, mâu tơmeăm ki tê tung roh Têt hiăng châ mâu ngế tê tơbleăng hên tơmeăm, lĕm mơnâ mâ ngăn, laga kơxô̆ mơngế rôe xuân ối iâ. Nâ Lê Thị Thùy Như, ối a kơpong C, kơchơ Tíu xiâm pơlê kong kơdrâm Ƀuôn Ma Thuột hiăng 15 hơnăm tê mâu tơmeăm ki xúa tung rơpŏng hngêi tối ăm ‘nâi, tơdroăng rôe tơmeăm hơnăm kố cho iâ.

“Iâ tâ hơnăm nah, pơtih hơnăm nah tê châ 5 – 7 rơtuh, hơnăm kố mê bu 2 troh 3 rơtuh tơrôu têa. Hơnăm nah tơmeăm kố sap ing 20 tơngi klêng mê tê đi đo, laga hơnăm kố rơhĭng tâ’’.

Hên tíu tê tơmeăm kơƀăn kĕo, kơƀăn hăng, pơ’leăng pía kái xuân rơhĭng rơhối mơngế ki rôe. Tiô pôa Lương Ngọc Hoàng pơkuâ môi tíu tê kơƀăn kĕo a Kơchơ Tíu xiâm pơlê kong kơdrâm Ƀuôn Ma Thuột, hơnăm kố tơdroăng ki rôe hrá, bu ai kơdrâm a mâu hâi mơ’nui măng tĭng, pôa bu rôe tơmeăm ƀă 60% tâng pơchông ƀă hơnăm nah, laga ƀă tơdroăng rôe môi tiah nôkố mơni ôh tá khên pói tơngah tâi tơmeăm:

“Kơxô̆ mơngế rôe xuân ôh tá kơdrâm to lâi, yă mê ôh tá tâk ôh. Môi tiah hơnăm nah nôkố xuân hiăng kơdrâm, tâng pơchông ƀă hơnăm nah nôkố xuân tá hâi ai kơdrâm mơngế lăm rôe’’.

Tối hdrối tơdroăng ki kơdroh mơngế lăm rôe dêi kơchơ tung roh Têt hơnăm kố, hên mâu ngế tê mơdró kŭn a Dak Lak hiăng hbrâ ti tăng tơdroăng kal vâ, tơdroăng ki hâk vâ rôe dêi mơngế rôe xúa vâ pêi pro mâu troăng ki tơtro tung hbrâ ‘măn, tê tơmeăm. Mâu ngế tê mơdró kŭn xuân hiăng po rơdâ mâu ƀâng tê tơmeăm ing phôn râng kŏng, website, mâu tai khoăn măng pơlê pơla môi tiah Facebook, Zalo vâ tơ’lêi hlâu châ achê ƀă mâu ngế rôe tâ.

Mâu tơdroăng ki mơhnhôk rôe ai ăm tơ’nôm tơmeăm, kơdroh yă, rơtế ƀă tơdroăng pơhlêh nếo troăng mơđah tơbleăng, tơbleăng tơmeăm xuân châ mâu ngế tê mơdró kŭn xúa vâ mơhnhôk tơdroăng tơtrŏng dêi tơmối, mơhnhôk tơdroăng kal vâ rôe xúa. Nâ Nguyễn Hằng Nga, pơkuâ tíu tê hmân ếo tối:

“Hơnăm kố tối tơdjuôm mê hrá tâ, mơngế rôe mê kơdroh hên tâ. Ngế rôe ki hmâ xuân troh laga pơtih hdrối nah vâi rôe 10 mê nôkố rôe 5 – 6, ƀă mơngế troh rôe ki nếo cho iâ tâ. Mơngế tê mơdró kŭn xuân mơ-eăm vâ rak, mâu tơmeăm ki ‘nâ to kơnâ laga xuân ôh tá khên mơdêk xua mơngế ki rôe cho mơngế ki hmâ rôe sap ing nah troh nôkố, tâng mơdêk yă ôh tá chiâng ôh xua mê á tê vâ rak mơngế ki rôe, thăm nếo ai mâu tơmeăm ôh tá khên tiô tâk ôh laga á rơkâ iâ vâ rak hluâ drêng pá puât kố’’.

Ôh tá xê to kơchơ mơdró tơmeăm xúa rơhĭng tơmối troh rôe mê tíu tê reăng mai xuân iâ êt mơngế lăm rôe. Pôa Quang Thế Phong, môi ngế pơkuâ kơdrum reăng mai kân a cheăm Hòa Phú, pơlê kong kơdrâm Ƀuôn Ma Thuột tối, hơnăm kố kong prâi tơ’lêi hlâu ăm mâu khu pêt reăng mai krê hlá ƀă rak reăng vâ reăng tơpo tro roh pơxiâm rơnó Hơngui. Rơnó reăng Têt hơnăm kố, pôa Phong pêt 3.000 xiâm loăng mai, ƀă hơnăm phá dêi pó. Nôkố pôa djâ loăng mai ‘măn tung kơ’lo vâ tê. Rơnó mai hơnăm kố kơxô̆ tê hên tâ hơnăm nah dâng 500 xiâm, laga châ liăn rơkâ ôh tá hên.

“Yă hơnăm kố ôh tá môi tiah rêm hơnăm xua mai mâu kơpong ki ê vâi djâ tê a kố hên. Pơtih môi xiâm hơnăm nah tê 4 rơtuh mê Têt hơnăm kố thế kơdroh chu 3 rơtuh 500 rơpâu thăm nếo chu ối 3 rơtuh. Mâu ngế ki pêt môi tiah ngin thế pơhlêh yă vâ tơbriât ƀă mâu tíu ê djâ troh a kố. Nôkố kơdrum hngêi á hiăng tơdah tê iâ yă ki rôe hên, ƀă kơxô̆ ki ê djâ a plông kân Ƀuôn Ma Thuột tê a hâi lơ 22/12 âm lĭch la ngiâ’’.

Kuăn pơlê mơ’no hrê liăn iâ ƀă tơdroăng ki pơhlêh ‘na tơdroăng ki hmâ rôe Têt dêi mâu rơpŏng pro kơchơ Têt a Dak Lak  rơhĭng rơhối. Mâu ngế tê mơdró kŭn ƀă hngêi tê rôe tơmeăm xuân ôh tá khên rôe hên, xua mê rêm ngế pơrá tơkôm tơdroăng kơdrâm dêi kơchơ mơdró a mâu hâi achê Têt, drêng mâu ngế pêi cheăng châ vêh pơlê xiâm ƀă châ tơdah liăn khế.