Hơnăm hriâm 2024 – 2025, roh apoăng hok tro lâm 12 kêi đeăng Tơdroăng hnê hriâm phôh thông 2018, ƀă mâu tơdroăng pơhlêh ki xiâm, ing tơdroăng mơnhên troăng prôk la ngiâ tơdroăng xiâm troh tơdroăng mơjiâng tơmeăm ƀă ivá mơngế hriâm. Xuân tung hơnăm kố, hneăng tơ’noăng mơgêi trắc nghiê̆m châ tơ’nôm mâu tơdroăng kơ-êng nếo, vâ mơdêk tơdroăng ki ai hên khu ƀai ƀă mơnhên ivá dêi hok tro. O Lê Minh Hưng, hok tro lâm 12, Hngêi trung THPT Buôn Ma Thuột, kong pơlê Dak Lak tối:

‘’Tơdroăng tơ’noăng hơnăm kố pơhlêh hên, ki rơhêng vâ tối cho môi tôh hợp. Á hlo tơná thế hriâm ƀă pơtâp hên tơdroăng kơ-êng hên tâ, rế tơniăn tơdroăng ki rơkê, rế thế ai tơ’nôm ivá tơmiêt, pơkâ pêi. Mơhé thái cô tŏng gum hên laga á o xuân tâ pá xua kố cho hneăng tơ’noăng ki kal pơkâ tơdroăng la ngiâ’’.

Nôkố, mâu hngêi trung hriâm tung kong pơlê Dak Lak dế mot hneăng ki pơtâp hên ăm hok tro lâm 12. Thái cô tơkŭm hnê tơdroăng ki kal, pơtâp tơdroăng pro ƀai rĕng ƀă tơtro tiô pơkâ dêi đê tơ’noăng, kum hok tro hbrâ mot hneăng tơ’noăng.

Jâ Nguyễn Thị Xuân, Cô pơkuâ Hngêi trung THPT Lê Quý Đôn, pơlê kong kơdrâm Ƀuôn Ma Thuột tối ăm ‘nâi: Hngêi trung hiăng tơkŭm po hên roh tơ’noăng mơnhên, rah khu hok tro vâ tơkŭm hnê pơtâp tiô khu, kum kơdroh pá ƀă mơdêk ki châ tơƀrê tung hriâm pơtâp. Nếo achê kố, hok tro hiăng veăng hneăng tơ’noăng mơnúa mơgêi râ má pái THPT hơnăm 2025 xua Khu pơkuâ Hnê hriâm ƀă hnê mơjiâng tơkŭm po. Kố cho tơdroăng ki kal vâ mâu vâi o pro hmâ ƀă đê tơ’noăng ƀă tơdroăng a kơbong tơ’noăng tơdroăng nếo.

‘’Hneăng tơ’noăng kố vâ vêh mơnhên tơdroăng hriâm tâp xuân môi tiah tơdroăng ki châ tơƀrê hriâm tâp a hngêi trung vâ hngêi trung ai mâu tơdroăng mơnhên pơhlêh hnê mơhno ‘na hnê hriâm tung hngêi  trung vâ tơtro tâ, châ pơkâ sap ing apoăng hơnăm hriâm  mê cho hơnăm hriâm tơmiêt troh hok tro châ plâh mơgêi 100%, ing mê mâu vâi o ai roh tơ’lêi mot hriâm a mâu hngêi trung kân ki mâu vâi o pói vâ’’.

A mâu hngêi trung ối tung kơpong hơhngế, hơhngo, kơpong tơkăng kong – tíu ki hên cho hok tro hdroâng kuăn ngo, tơdroăng hriâm pơtâp châ pêi pro ƀeăn ƀĕng rơkê vâ tơtro ƀă tơdroăng nôkố. Pôa Nguyễn Phan Anh, Phŏ Thái pơkuâ Hngêi trung THPT Lắk, tơring Lắk, kong pơlê Dak Lak tối ăm ‘nâi, a hneăng hiăng vâ troh, pakĭng tơdroăng mơdêk hriâm tơdroăng ki rơkê, mâu thái cô tơtrŏng mơjiâng ivá mơhnhôk hiêm mơno ăm mâu vâi o. Pơtối mê, hngêi trung hiăng séa ngăn, rah khu hok tro vâ mơjiâng pơkâ pêi hriâm tâp, kum mâu vâi o loi tơngah mot a hneăng tơ’noăng.

‘’Klêi kơ’nâi tơ’noăng mơnúa hngêi trung hriâm pơtâp ăm mâu vâi o tơ’nôm dâng 4 măng tĭng. Tiô tối hdrối sap ing hâi lơ 20/5 troh hâi lơ 20/6 tơkŭm tâi tâng mâu vâi o hriâm tá hâi chiâng khât ƀă lâm 12 mê hnê tơ’nôm ăm mâu vâi o tơ’nôm 4 măng tĭng a hngêi trung’’.

Hneăng tơ’noăng mơgêi râ má pái THPT hơnăm 2025, kong pơlê Dak Lak ai vâ chê 22.000 hok tro kĭ veăng tơ’noăng. Pôa Đỗ Tường Hiệp, Phŏ Kăn pơkuâ Khu pơkuâ Hnê hriâm ƀă Hnê mơjiâng tuăn ngôa rơkê kong pơlê Dak Lak  tối ăm ‘nâi, Khu hiăng hnê mơhno mâu khu pơkuâ hnê hriâm mơnhên ki dâi lĕm hneăng tơ’noăng hơnăm hdrối, mơjiâng tơdroăng xiâm, ‘noăng chư chêh ƀă pơkâ pêi hriâm pơtâp tơtro ƀă tơdroăng nôkố dêi rêm hngêi trung hiăng ai tơdroăng ki pơhlêh troăng hriâm pơtâp tơtro tiô troăng kơdroh, mơdêk ki châ tơƀrê. Pôa Đỗ Tường Hiệp mơnhên, kơvâ hnê hriâm hiăng pơkâ mâu hngêi trung chêh inâi mâu hok tro ai tơdroăng rêh ối pá puât vâ tŏng gum teăm tơdrêng, ôh tá ăm ai tơdroăng hok tro thế lôi pơtê tơ’noăng.

‘’Hnê mơhno mâu hngêi trung mơjiâng tơ’nôm pơkâ pêi hnê hriâm tung hngêi trung tơtro ƀă tơdroăng nôkố dêi hngêi trung ƀă mâu hok tro. Drêng thông tư 29 mơjiâng chiâng, thế ai pơkâ pêi vâ mơhnhôk môi khu thái cô hnê mơhno ăm hok tro ôh tá tơkŭm po hnê tơ’nôm hriâm tơ’nôm. Ki rơhêng vâ tối ƀă mâu vâi o a kơpong hơhngế, hơhngo, kơpong hdroâng kuăn ngo mê ai tŏng gum ‘na hiêm mơno, ‘na tơdroăng hriâm tâp mê tá kế tơmeăm khoăng vâ mâu vâi o ai ivá hriâm tâp ƀă tơ’noăng lĕm tro má môi’’.

Hbrâ inhên, mơnhên tro ivá hok tro ƀă mơjiâng pơkâ pêi hriâm tâp tơtro, kơvâ hnê hriâm ƀă Hnê mơjiâng tuăn ngôa rơkê kong pơlê Dak Lak dế mơ-eăm tơniăn hneăng tơ’noăng mơgêi râ má pái THPT 2025 ôh tá xê to châ tơƀrê ‘na tơdroăng cheăng , mê ối pơtối thăm loi tơngah ăm mâu vâi o mot hneăng tơ’noăng hên pơloăng mơnúa laga xuân hên roh tơ’lêi a la ngiâ./.