Mâu chó dêi ngoh Y Bruat Niê, ối a ƀuôn Ea Phê, cheăm Ea Phê, tơring Krông Pač hiăng păn lối 3 hơnăm la hâi môi hdroh pâk pơkeăng mơdât kôk rơxok. Ngoh ăm ‘nâi xua chó kơ’nêi hmâng vâ hiăng ton, ngoh xâu chó lơ kâ drêng rup.

“Hiăng ton ôh tá pâk, péa to chó kăn krâ ‘nâng mê ôh tá khên vâ rup, pin rup gá kâ, xâu lơ kâ mê ôh tá  châ pâk. Xua rơ-iô mê, tâng chó kâ ah chiâng ai trếo kăm, tâng ôh tá lăm pơlât a hngêi pơkeăng kô hlâ hlối”.

Tâng tối tơbleăng tung loa dêi cheăm ‘na hâi khế pâk mơdât kôk rơxok ăm chó miếo, rơpŏng ngoh Ngô Quốc Đạt, a cheăm Ea Kuăng, tơring Krông Pač, kong pơlê Dak Lak hiăng hbrâ tơdroăng cheăng vâ ối a hngêi tơkôm mâu kăn ƀô̆ ngăn pơkeăng pơlât mơnăn troh pâk mơdât kôk rơxok ăm 3 to chó dêi rơpŏng hngêi.

Ngoh ăm ‘nâi, a kố vâ tối hngêi ki lâi xuân păn iâ gá 1 to chó, miếo, la ôh tá ai ngế ki lâi vâ  djâ dêi kuăn kiâ ki păn lăm pâk pơkeăng mơdât kôk rơxok, vâi hmâ tơkôm la lâi ai rôh pơkâ pâk tiô tơdroăng dêi Tơnêi têa.

“Pơreăng kôk rơxok mê xuân ‘nâi gá rơ-iô, ‘na pâk pơkeăng mơdât kôk rơxok mê xuân tro, tâng ai khu cheăng pơlât mơnăn troh lăm pâk a hngêi á ăm pâk dêi chó. Tâng ai pơkeăng pâk xuân tro há, pin hlối hbrâ mơdât pơreăng kôk rơxok ăm chó, hên hdrôh tâng trâm ôh tá mơhúa xuân kơdroh há’’.

Tơring Krông Pač ai lối 10.000 rơpŏng păn chó ƀă tâi tâng mâu chó mê lối 15.000 to. Mơhé ti mê hơnăm 2022 kơvâ ngăn pơlât mơnăn bú tơbleăng pâk pơkeăng mơdât pơreăng ăm 3.800 to. Tiô pôa Võ Văn Vàng - Ngế pơkuâ ngăn ‘na păn pơnăn ƀă Tíu pơlât mơnăn tơring Krông Pač tối, ki pá má môi cho mơngế păn chó ôh tá vâ tơrŭm, ti vâ hmâng.

“Ki kal má môi nốkố cho tơdroăng ki hlê plĕng dêi mơngế păn mơnăn. Tâng mơngế ki păn mơnăn hlê vâ môi tuăn pêi pro mê tơdroăng pâk pơkeăng mơdât kôk, rơxok ăm chó kô hlâ. Laga nôkố, kuăn pơlê xuân ôh tá vâ tơmâng tơdroăng pâk pơkeăng mơdât chó kôk rơxok.

Hên drêng ‘nâ kuăn pơlê pêi pro tơdroăng oh tá tro kơ tuăn ngăn tá lĕm kơ mơngế ki lăm pâk, pơtih ai mâu cheăng pơlât mơnăn troh vâ pâk kuăn pơlê mơhno chó mê, tâng châ rup pâk’’.

Tiô riân ngăn dêi Khu xiâm ngăn ‘na pêi chiâk ƀă Mơnhông thôn pơlê, sap hơnăm 2018 troh hơnăm 2022, Dak Lak hiăng ai 25 ngế hlâ xua pơreăng kôk rơxok. Tung mê, ai mâu ngế tung châ hiăng ai pơreăng ton, hiăng tro chó kâ ton ing 4 khế troh 1 hơnăm kơ’nâi nếo ‘nâi ai pơreăng kôk. Tâi tâng mâu ngế ki hlâ mê xuân to mâu ki ôh tá vâ lăm pâk pơkeăng mơdât pơreăng klêi tro chó, miếo kâ, kơ’viêu.

Mơhé rêm hơnăm xuân ‘nâi ai mâu ngế hlâ xua tro chó rơxok kâ, la tơdroăng pâk vaccine hbrâ mơdât kôk, rơxok ăm chó ki păn a Dak Lak bú lối 30% tung tâi tâng kơxô̆ 360 rơpâu to chó, miếo. Nôkố Dak Lak dế hnê tối  tơdroăng thế pâk vaccine hbrâ mơdât pơreăng kôk, rơxok ăm mâu chó miếo tung lâp kong pơlê sap hâi lơ 25/3 troh hâi lơ 24/4.

Ing mê, mâu rơpŏng kuăn ngo, rơpŏng ai hnoăng tơnêi têa, kơtiê kô châ  pâk tê kơtê ăm mâu chó miếo. Mâu ki ê kơxô̆ liăn pâk mơdât pơreăng mê ai 22 rơpâu 100 liăn môi hdroh pâk.