Hâi lơ 16/7, Hô̆i đong kuăn pơlê kong pơlê Dak Lak hneăng má X, hneăng hơnăm 2021 – 2026 hiăng tơbleăng hnoăng pơcháu ăm, tơdroăng pơkâ pêi mơnhông cheăng kâ – rêh ối pơlê pơla, tơniăn gâk kring tơnêi têa, gâk kring tơniăn, khŏm mơ-eăm pêi kêi đeăng pơkâ tơtêk 8% plâ hơnăm kố ƀă pơkâ hên tơdroăng xiâm ki kal vâ tah lôi pá puât ăm khu râ kăn pơkuâ kong pơlê péa râ pêi cheăng tơniăn, châ tơƀrê.

6 khế apoăng hơnăm, cheăng kâ – rêh ối pơlê pơla kong pơlê Dak Lak rak tơdroăng tơtêk hôm, châ lối 7%, tâi tâng pêi lo liăn ngân châ lối 8.700 rơtal liăn, tâi tâng pêi lo liăn tê ngi kong têa ê 1.520 rơtuh dollars...6 khế mơ’nui hơnăm, Dak Lak mơ-eăm châ kơlo tơtêk cheăng kâ 8,64%; kơdroh kơxô̆ rơpŏng kơtiê sap ing 3% tơngi lêng...

A roh hôp, Hô̆i đong kuăn pơlê kong pơlê Dak Lak hiăng séa ngăn, pơkâ tơbleăng mâu pơkâ: pơhlêh tối hdrối liăn ngân kong pơlê, pơhlêh pơkâ pêi mơ’no liăn cheăng tơnêi têa; tơ’nôm kơxô̆ liăn mơ’no cheăng đi đo ăm mâu tơdroăng xiâm tơnêi têa; tơbleăng troăng tơkŭm po, troăng hơlâ tŏng gum kăn ƀô̆, kŏng chưk, viên chưk, mơngế pêi cheăng a Tíu xiâm pơkuâ tơnêi têa nếo; pơkâ kơlo mơ’no ăm mâu tơdroăng khôi túa lĕm, rơhdruê xuăng, mơhnhôk tŏng gum hên tơdroăng cheăng tơnêi têa...

Tiô Pơkâ ki HĐND kong pơlê Dak Lak nếo tơbleăng, kăn ƀô̆, kong chưk, viên chưk ƀă ngế pêi cheăng ối tung mâu kơ koan Đảng, Tơnêi têa, Măt trâ̆n Tơnêi têa Việt Nam, mâu khu tơrŭm cheăng kal kí rêh ối pơlê pơla châ pơcháu hnoăng cheăng troh pêi cheăng a tíu pêi cheăng kong pơlê Dak Lak (klêi kơ’nâi ‘mot tơkŭm ƀă kong pơlê Phú Yên) ƀă tíu pêi cheăng râ cheăm kô châ tŏng gum liăn prôk lăm, liăn mung hngêi ối ƀă kơxô̆ liăn gum cho môi xôh. Ki nhên, ngế ki lăm pêi cheăng a tíu pêi cheăng kong pơlê kô châ gum apoăng cho 2 rơtuh liăn prôk lăm, 3 rơtuh liăn cho liăn mung hngêi ối. Ƀă mâu ngế ki pêi cheăng a tíu pêi cheăng râ cheăm, kơlo liăn gum châ riân tiô kơtăn prôk lăm, cho sap ing 500 rơpâu troh 2 rơtuh liăn môi ngế tung môi khế ƀă 1,5 rơtuh môi ngế môi ngế liăn mung hngêi ối (tâng ối a hngế lối 30km) ƀă 1 rơtuh liăn gum môi xôh. Tung pơla  pêi pro troăng hơlâ tŏng gum cho 12 khế.