Hngêi hôp kân Ƀơrô Kăn sát Rak ngăn pro hlá mơ-eá ƀă pro Tơniăn pơle pơla (kơxô̆ 50 Lý Tự Trọng, bêng Buôn Ma Thuột, kong pơlê Dak) hring ngế đảng viên dêi Đảng ƀô̆ Tíu xiâm ngăn túa lĕm tro, Tơ’noăng ivá ƀă Ôm hyô, Tíu pro hnoăng mơhá kong pơlê Dak Lak troh lăm pro hlá mơ-éa pơ’lêh theh. Đảng viên Hồ Văn Tĩnh ăm ‘nâi, tung pơlê pro  mê vâi pro rĕng.

“Tối tơdjuôm, pro klêi hlá mơ-éa ton dâng 3-5 phut, tơdroăng ki tơkôm mê xuân bú 5- 7 phut tê, tâi tâng tá tơdroăng pro bú ton 10 - 15 phut. Ki apoăng, mâu kong an hnê mơhno ăm tíu 'nân xup um, klêi mê po ngăn tơdroăng chêh ‘na pin tung hồ sơ đảng viên môi tiah: hâi khế hơnăm kot mâ, hâi mot đảng, pơlê xiâm nah ulâi, tíu ối nôkố ulâi... tâng tŭm tơdroăng mê hiăng tro khâp kô hiăng klêi tơdroăng pơlêh pro”.

A tíu pro pơ’lêh theh Kong an bêng Ea Kao, kong pơlê Dak Lak, xuân ai chât ngế đảng viên troh pro pơ’lêh theh. Đảng viên Trần Quang Thống, 65 hơnăm, Chi ƀô̆ Tôh Yân kơphô̆ 11, bêng Ea Kao tối, tơdroăng pro pơ’lêh theh a kố tơ’lêi tê.

“A mot Đảng hơnăm 1984, troh nôkố hiăng luâ péa hdroh pơ’lêh theh, xuân tung mâu lêng. Rôh kố, pơ’leh theh ai krâ chip  tiô pơkâ ki nếo dêi Khu Kăn xiâm vâ rak ngăn đẻng viên tro tâ hlối mơjiâng mâu khu  tơrŭm cheăng đảng krá nhên tâ. Mâu Kong an xo pêi hnoăng cheăng ki pro pơ’lêh theh pêi rĕng, nhên krâu, ƀă pú ton péa pái phut tê hiăng klêi”.

Kong pơlê Dak Lak klêi tơ’mot ai lối 137.000 ngế đảng viên, dêi lối 5.200 khu tơrŭm tíu cheăng đảng. Pêi pro tiô Hnê mơhno kơxô̆ 51 dêi Kăn xiâm hnê ngăn Đảng ƀă pơkâ dêi Khu xiâm Kong an kong pơlê hiăng hnê mơhno Ƀơrô Kăn sát Rak ngăn pro hlá mơ-éa ƀă Tơniăn pơlê pơla ƀă Kong an 102 to cheăm, bêng, ăm rơxế ƀă mâu kong an troh vâ tơbleăng tối, tơmâng xo pơ’lêh pro theh đảng viên. Kơ’nâi lối môi măng tĭng tơbleăng hiăng pơ’lêh pro theh ăm lối 70.000 to theh, châ lối 50% pơkâ. Tiô tối hdrối tung măng tĭng kố, tơdroăng pơ’leh pro theh kô pro klêi, luâ tơdroăng pơcháu. Thiê̆u tă Lê Đình Đô, Phŏ Ƀơrô Kăn sát rak ngăn pro hlá mơ-éa ƀă Tơniăn pơlê pơla, Kong an kong pơlê, ăm ‘nâi:

“Ƀơrô hbrâ tăng ‘nâi plĕng ăm Kăn xiâm Kong an kong pơlê hbrâ tơmeăm, kơmăi kơmok ăm 120 tíu pêi cheăng kong an cheăm, bêng tung lâp kong pơlê pêi cheăng xo tơveh pơ’lêh pro  the nếo. Pakĭng mê, a peăng mâ hâi Lo kong pơlê Dak Lak ăm 2 tíu xo tơveh pơ’lêh pro theh nếo ăm mâu đảng viên ki dế  pêi cheăng a kố;  ƀă kơpong peăng mâ hâi lo Kong pơlê xuân ai 3 tíu pêi cheăng “pêi cheăng plâ hâi măng’’, ôh tá pơtê hâi tơdrốu ƀă hâi Tĭng vâ xo tơveh theh ton pơ’lêh pro theh nếo ăm đảng viên.”